80281

विद्यार्थ्यांनो, राष्ट्रभक्ती आत्मसात करा

मेजर संजय सावंत ः कुडाळ राऊळ महाविद्यालयात सत्कार सोहळा

सकाळ वृत्तसेवा
कुडाळ, ता. २७ ः राष्ट्रीय छात्र सेना विद्यार्थ्यांनी राष्ट्रभक्ती आत्मसात करून देशरक्षणासाठी सेवा करावी, असे प्रतिपादन सुभेदार मेजर संजय सावंत यांनी रोटरी क्लब ऑफ कुडाळ आयोजित ‘सन्मान एका योद्ध्याचा’ कार्यक्रमात केले.
कुडाळ रोटरी क्लब आयोजित ऑपरेशन सिंदूर, ऑपरेशन पराक्रम, बालाकोट एअर स्ट्राईक, सर्जिकल स्ट्राईक अशा भारतीय सैन्यदलातील विविध कामगिरींमध्ये अतुलनीय पराक्रम दाखविणारे कारिवडे (ता. सावंतवाडी) गावचे सुपुत्र सुभेदार मेजर संजय सावंत (२८ पदनाभन एअर डिफेन्स युनिट प्रमूख, इंडियन आर्मी) यांचा ‘सन्मान एका योद्ध्याचा’ हा भव्य सत्कार सोहळा व भारत सरकार राष्ट्रीय छात्र सेना थल सैनिक शिबिर अंतर्गत राष्ट्रीय स्तरावर निवड झालेल्या कॅडेटस् व प्रशिक्षकांचा सन्मान सोहळा येथील संत राऊळ महाराज कॉलेजमध्ये झाला. यावेळी तहसीलदार वीरसिंग वसावे, रोटरी क्लब ऑफ कुडाळ अध्यक्ष राजीव पवार, कॅप्टन शंकर भाईप, प्राचार्य डॉ. स्मिता सुरवसे, सचिन मदने, प्रणय तेली, गजानन कांदळगावकर, डॉ. एस. टी. आवटे, डॉ. विद्याधर तायशेट्ये आदी मान्यवर होते.
तहसीलदार वसावे यांनी, सुभेदार मेजर संजय सावंत यांच्यासारख्या खऱ्या हिरोचा सन्मान कुडाळ रोटरी क्लबने केल्याचे सांगून या उपक्रमाचे कौतुक केले. प्राचार्य डॉ. स्मिता सुरवसे यांनी, आजचा दिवस अविस्मरणीय आहे. भारतीय सैन्य दलातील एक शिलेदार डिफेन्स युनिट प्रमुख सुभेदार मेजर सावंत यांचा सन्मान महाविद्यालयात होत असून याचा सार्थ अभिमान आहे, असे सांगितले. कळसुलकर इंग्लिश स्कूल सावंतवाडीचे फर्स्ट ऑफिसर गोपाळ गवस यांनी कुडाळ रोटरीचे आभार व्यक्त करताना जिल्ह्यातील राष्ट्रीय छात्र सेना युनिटची सविस्तर माहिती दिली. राष्ट्रीय छात्र सेना युनिटची हक्काची जागा जिल्ह्यात उपलब्ध व्हावी, अशी इच्छा त्यांनी व्यक्त केली. राष्ट्रीय छात्र सेना चळवळ सिंधुदुर्गात योग्य पध्दतीने सुरू असल्याचे मत आवटे यांनी मत व्यक्त केले. कुडाळ रोटरी अध्यक्ष राजीव पवार यांनी सुभेदार मेजर सावंत यांचे विचार युवा वर्गासाठी प्रेरणादायी असल्याचे सांगून आभार मानले. असिस्टंट गव्हर्नर सचिन मदने यांनी सूत्रसंचालन केले.
.......................
सुभेदार मेजर सावंत यांचा सन्मान
भारताच्या एअर डिफेन्स युनिट २८ चे नेतृत्व करताना ‘अग्निवीर’मधील जवानांना घेऊन ‘ऑपरेशन सिंदूर’मध्ये अद्ययावत एअर डिफेन्स अवजारांवर पाकिस्तानचे ४५ ड्रोन हवेतच उद्ध्वस्त करण्याचा पराक्रम सुभेदार सावंत यांनी केला होता. याबद्दल भारताचे संरक्षणमंत्री राजनाथ सिंह यांनी त्यांचा विशेष सन्मान केला आहे.