गुरुमाऊली पतसंस्थेची
मुदत ठेव योजना
सावर्डे : सावर्डे येथील गुरुमाऊली सहकारी पतसंस्थेने श्रावणमासनिमित्त शंभर दिवसासाठी १० टक्के व्याजदराने ठेव योजना सुरू केली आहे. योजनेला ग्राहकांचा चांगला प्रतिसाद मिळत आहे, असे संस्थाध्यक्ष अशोक थेराडे यांनी सांगितले. योजनेत ज्येष्ठ नागरिकांना अर्धा टक्के जादा व्याजदर देण्यात येणार आहे. पतसंस्थेने शेतकरी, व्यावसायिक महिला यांना दैनंदिन स्वरूपात व्यवहारावरील बचतीवर ६ टक्के व्याजदराने उत्पन्न मिळवण्याची संधी दिली आहे. या संस्थेने कोअर बँकिंग प्रणाली सुरू केली असून आरटीजीएस एनईएफटी क्यू आर कोड सुविधाही दिली आहे. या संस्थेतर्फे पिग्मी मोबाईल ॲपद्वारे कलेक्शन केले जाते. तसेच प्रत्येक ग्राहकांसाठी प्रत्येक व्यवहारानंतर एसएमएसची सुविधा आहे. संस्थेच्या वतीने सोने तारण, वैयक्तिक, व्यवसायिक व तारण कर्जही दिले जाते. रत्नागिरी व मुंबई या ठिकाणी संस्थेच्या दहा शाखा आहेत, असे सचिव समीर थेराडे यांनी सांगितले.

शिर्के प्रशालेत
सायबर शिक्षण
रत्नागिरी ः गोगटे-जोगळेकर महाविद्यालयातील सायबर वॉरिअर क्लब आणि क्विक हेल फाऊंडेशनच्या सहकार्याने सायबर सुरक्षेसाठी सायबर शिक्षण मोहीम रत्नागिरीतील शिर्के प्रशालेत राबविण्यात आली. विद्यार्थ्यांना सायबर गुन्ह्यांबद्दल माहिती देणे हा या कार्यक्रमाचा मुख्य उद्देश आहे. या कार्यक्रमात ओटीपी फसवणूक, गेमिंग फ्रॉड, सोशल मिडिया फसवणूक यासारख्या सायबर गुन्ह्यांवर आधारित माहितीपूर्ण सादरीकरण, संवादसत्र आणि प्रश्नोत्तर सत्र घेण्यात आले. यावेळी सायबर वॉरिअर कल्बचे सदस्य पार्वती रावल, संस्कृती जाधव, चिन्मय सुर्वे, सचिन राठोड, वैष्णवी शिरसाट, स्नेहा भिडे, वेदांग पाटणकर, राज गुरव, वैष्णवी गुरव, चिरायु चव्हाण, मिहीर सावंत, श्रेयस चव्हाण यांनी सायबर गुन्हे टाळण्यासाठी आवश्यक असलेल्या सावधगिरीच्या उपायांची माहिती दिली. यावेळी शिर्के प्रशालेचे मुख्याध्यापक कांबळे यांनी सांगितले की, विद्यार्थ्यांना सायबर जागरुकतेचे शिक्षण मिळणे ही आजच्या काळाची गरज आहे.