विद्यार्थ्यांनी अनुभवली निसर्गाची किमया
चिपळूण : परशुराम एज्युकेशन सोसायटी संचलित प्राथमिक शाळा, पोफळी येथे ‘आनंददायी शनिवार’अंतर्गत शनिवारी (ता. २६) पहिली ते चौथीच्या विद्यार्थ्यांनी निसर्गाला भेट देऊन निसर्गाची किमया अनुभवली. मुख्याध्यापक महेंद्र कापडी यांच्या मार्गदर्शनाखाली आपल्या भोवतालचा परिसर, त्यातील निसर्ग अनुभवण्याचा उपक्रम राबविण्यात आला.
या उपक्रमांतर्गत शालेय परिसर व परिसरातील वनस्पती, वेली, झाडे, आंबा, नारळ, काजू यांच्या बागा बघायला मिळाल्या. डोंगर, नदी, ओढे, धबधबा, पाऊलवाटा, बांध, शेती, पूल आणि साकव यांची ओळख करून देण्यात आली. तसेच रानभाज्या, औषधी वनस्पती याही प्रत्यक्ष दाखवण्यात आल्या. या उपक्रमातून विद्यार्थ्यांना निसर्गाची प्रत्यक्ष अनुभूती देण्यात आली. हलक्याशा पावसाच्या सरीमध्ये सर्व विद्यार्थी, शिक्षक यांनी भिजण्याचा आनंद घेत निसर्गाची मनमोहक दृश्ये पाहिली. याशिवाय, हिरवागार शालू पांघरलेला निसर्ग म्हणजे काय ते, या उपक्रमातून प्रत्यक्ष अनुभवता आले.