पायाला जखम
झालेल्या वृद्धाचा मृत्यू
रत्नागिरीः एक महिन्यापूर्वी पायाला जखम व सूज आलेल्या तालुक्यातील दाभोळ येथील वृद्धाला अधिक उपचारासाठी जिल्हा शासकीय रुग्णालयात दाखल केले होते. उपचारादरम्यान त्यांचा मृत्यू झाला. काशिनाथ रामचंद्र बैकर (वय ७५, रा. दाभोळ, ता. दापोली) मृत वृद्धाचे नाव आहे. ही घटना रविवारी (ता. २७) रात्री अडीचच्या सुमारास जिल्हा रुग्णालयात घडली. पोलिसांकडून मिळालेल्या माहितीनुसार, काशिनाथ बैकर यांच्या पायाला सूज व जखम झाल्याने त्यांचे मालक मिलिंद शेट्ये (रा. दाभोळ, रत्नागिरी) यांनी अधिक उपचारासाठी जिल्हा रुग्णालयात दाखल केले होते.
------------------
गावठी दारू विक्री
करणाऱ्या महिलेविरुद्ध गुन्हा
रत्नागिरी ः विनापरवाना हातभट्टीची दारूची विक्री करणाऱ्या महिलेविरुद्ध लांजा पोलिसात गुन्हा दाखल केला आहे. ही घटना रविवारी (ता. २७) सायंकाळी पावणेसातच्या सुमारास गवाणे-चव्हाणवाडी येथील एका पडक्या घराजवळ निदर्शनास आली. पोलिसांकडून मिळालेल्या माहितीनुसार, संशयित महिला ही विनापरवाना हातभट्टीची गावठी ४५० रुपयांची ४ लिटर दारू विक्री करण्याच्या उद्देशाने सापडली. या प्रकरणी महिला पोलिस हेडकॉन्स्टेबल उर्मिला शेंडे यांनी लांजा पोलिसात तक्रार दिली.
--------
साप चावल्याने
महिलेचा मृत्यू
रत्नागिरीः शेतात बेनणीचे काम करत असताना महिलेला फुरसे जातीचा साप चावला. अधिक उपचारासाठी जिल्हा शासकीय रुग्णालयात दाखल केले होते. तेथील वैद्यकीय अधिकारी श्रेयस माईल यांनी त्यांना तपासून मृत घोषित केले. हर्षदा हरेश बाईत (वय ३५, रा. तांबे पाखाडी, पडवे, ता. राजापूर) असे मृत महिलेचे नाव आहे. ही घटना २० जुलैला दुपारी चारच्या सुमारास शेतात बेनणी करत असताना घडली. पोलिसांकडून मिळालेल्या माहितीनुसार, बाईत या शेतात काम करत असताना दुपारी सव्वाबाराच्या सुमारास त्यांच्या हाताच्या बोटाला फुरसे जातीचा साप चावला. त्यांची जाऊ योगिता संतोष बाईत यांनी तत्काळ गावातील ग्रामस्थांच्या मदतीने उपचारासाठी प्रथम ग्रामीण रुग्णालय राजापूर येथे दाखल केले होते. तेथे तिची तब्येत जास्त बिघडल्याने अधिक उपचारासाठी जिल्हा रुग्णालयात दाखल केले होते. उपचारादरम्याने तेथील वैद्यकीय अधिकाऱ्यांनी तिला तपासून मृत घोषित केले.