80766

‘ग्रंथालय धोरण’चे
डॉ.कोटेवार सदस्य
मुणगे ः महाराष्ट्र राज्य सार्वजनिक ग्रंथालयाच्या ग्रंथालय धोरण समितीच्या सदस्यपदी महाराष्ट्र राज्य ग्रंथालय संघाचे अध्यक्ष डॉ. गजानन कोटेवार यांचा समावेश करण्यात आला. महाराष्ट्र राज्यातील सार्वजनिक ग्रंथालये आणि शासकीय ग्रंथालयांचे बळकटीकरण, डिजिटायझेशन व आधुनिकीकरणाच्या अनुषंगाने राज्याचे सार्वजनिक ग्रंथालय धोरण तयार करण्यासंदर्भात शासनास शिफारशी करण्यासाठी राज्य ग्रंथालय संचालकांनी उच्च व तंत्र शिक्षण विभागाकडे १९ जूनच्या शासन निर्णयान्वये नऊ सदस्यीय ग्रंथालय धोरण समिती गठित केली होती. या समितीमध्ये महाराष्ट्र ग्रंथालय संघाचे अध्यक्ष डॉ. कोटेवार यांना सदस्यत्व देण्याची विनंती ग्रंथालय संचालकांनी केली होती. त्यानुषंगाने उच्च व तंत्र शिक्षण विभागाने २४ जुलैच्या शासन निर्णयाने त्यांचा ग्रंथालय धोरण समितीमध्ये समावेश केला. डॉ. कोटेवार यांच्या समावेशामुळे राज्यातील शासमान्य सार्वजनिक ग्रंथालयांचे कित्येक वर्षे प्रलंबित असलेले प्रश्न मार्गी लागतील, अशी आशा राज्यातील ग्रंथालय कार्यकर्ते व सेवकांमध्ये निर्माण झाली आहे.
........................
80767

संजय शिंदे यांना
‘ग्रंथमित्र’ पुरस्कार
मुणगे ः महाराष्ट्र राज्य सार्वजनिक ग्रंथालयाचे डॉ. बाबासाहेब आंबेडकर उत्कृष्ट सार्वजनिक ग्रंथालय पुरस्कार आणि ग्रंथालय शास्त्राचे जनक डॉ. एस. आर. रंगनाथन उत्कृष्ट ग्रंथालय सेवक ग्रंथमित्र पुरस्कार जाहीर करण्यात आले. विभागस्तरीय ग्रंथालय सेवक (ग्रंथमित्र) पुरस्कार सिंधुदुर्ग जिल्ह्यातील नगर वाचन मंदिर मालवणचे ग्रंथपाल संजय शिंदे यांना उच्च व तंत्र शिक्षण विभाग महाराष्ट्र यांनी जाहीर केला आहे. वाचन संस्कृती वृद्धिंगत व्हावी, राज्यातील शासनमान्य सार्वजनिक ग्रंथालयांचे त्यात योगदान लाभावे तसेच ग्रंथालयांचा गुणात्मक विकास व्हावा, या उद्देशाने शासनाकडून दरवर्षी पुरस्कार देऊन सन्मानित करण्यात येते. शिंदे यांना उत्कृष्ट ग्रंथालय सेवक पुरस्कार जाहीर झाल्याबद्दल त्यांचे सर्वस्तरांतून अभिनंदन करण्यात येत आहे.