अवजड वाहतूक १६ तास रखडली
हातखंब्यातील अपघाताचा फटका ः पर्यायी मार्ग धोकादायक
सकाळ वृत्तसेवा
पाली, ता. २९ ः मुंबई-गोवा महामार्गावर हातखंबा येथील वळणावर सोमवारी रात्री एलपीजी गॅस टँकरला झालेल्या अपघातामुळे सोळा तास वाहतूक ठप्प होती. सुरक्षिततेच्या कारणास्तव वाहतूक पर्यायी मार्गे वळवली असली तरीही अवजड वाहने अडकून राहिली होती. पालीत एका बाजूला तर दुसरीकडे हातखंबा, निवळी येथे वाहने उभी होती.
हातखंबा अपघाताविषयी अधिक माहिती देताना महामार्ग वाहतूक पोलिस विभागाच्या रत्नागिरी विभागाच्या पोलिस निरीक्षक दीपाली जाधव यांनी सांगितले की, काल रात्री ११.३० वाजण्याच्या दरम्यान अपघात झाल्यानंतर सर्वप्रथम महामार्ग वाहतूक पोलिस व रत्नागिरी ग्रामीण पोलिस यांच्या मदतीने अपघातस्थळावरून काही अंतरावरच महामार्गावरील वाहतूक दोन्ही बाजूला पूर्णपणे थांबवली व त्यानंतर जयगड येथील जिंदल कंपनीच्या पथकाला, जिल्हा पोलिस दल, जिल्हा आपत्ती व्यवस्थापन यांनी ज्वालाग्राही गॅस टँकरमधील गॅसगळती रोखण्यासाठी व त्याचे केमिकल अ‍ॅनालिसिस करण्यासाठी पाचारण करण्यात येऊन गॅसगळती नियंत्रणात आणली. अपघातानंतर उलटलेल्या टँकरमधून मोठ्या प्रमाणात गॅसगळती सुरू झाल्याने खबरदारी म्हणून थांबवलेली वाहतूक गोव्यावरून मुंबईकडे येणारी वाहतूक तर मुंबईहून गोव्याकडे जाणारी वाहतूक पाली बावनदीमार्गे वळवली, तसेच काही मोठ्या वाहनांनी पाली, साखरपामार्गे संगमेश्वर जाणे पसंत केले तर स्थानिक वाहनचालकांनी रत्नागिरीला जाण्यासाठी पाली चांदेराई मार्ग निवडला. त्यामुळे फक्त अवजड वाहनांची यामध्ये कोंडी होऊन त्यांना सोळा तास रस्त्यातच अडकून राहावे लागले.

लोकप्रतिनिधींनी लक्ष देण्याची गरज
पाली ते हातखंबा बाव नदीदरम्यानच्या महामार्गावरील धोकादायक ठिकाणी अनेकदा अपघात घडत असल्याने या ठिकाणी पर्यायी मार्गाची आवश्यकता पुन्हा एकदा अधोरेखित होत असून, तो होण्यासाठी लोकप्रतिनिधींनी लक्ष देण्याची मागणी वाहनचालकांतून व्यक्त होत आहे.