82326

थकित वेतनप्रश्नी ग्रामपंचायत कर्मचारी एकवटले

जिल्हा परिषदेसमोर ‘ठिय्या’; प्रशासनातर्फे आंदोलनाची दखल

सकाळ वृत्तसेवा
सिंधुदुर्गनगरी, ता. ५ ः ग्रामपंचायत कर्मचाऱ्यांचे एप्रिल २०२५ पासूनचे थकीत वेतन आणि मागील १० महिन्यांची फरकाची रक्कम तत्काळ मिळावी, या मागणीसाठी महाराष्ट्र राज्य ग्रामपंचायत कर्मचारी युनियनच्या वतीने जिल्हा परिषद भवनासमोर ठिय्या आंदोलन करण्यात आले.
जिल्ह्यातील ४३४ ग्रामपंचायतींमध्ये कार्यरत असलेल्या ७५४ कर्मचाऱ्यांना एप्रिल २०२५ पासून वेतन मिळालेले नाही. तसेच १ सप्टेंबर २०२० ते ३१ मार्च २०२२ या कालावधीतील सुधारित किमान वेतनातील १० महिन्यांची फरकाची रक्कम मिळालेली नसल्याने जिल्ह्यातील ग्रामपंचायत कर्मचाऱ्यांनी आज काम बंद ठेवून जिल्हा परिषद प्रशासनाचे लक्ष वेधण्यासाठी जिल्हा परिषद भवनासमोर आंदोलन केले. जिल्हा परिषदकडे निधी उपलब्ध झाला असतानाही तो देण्यास विलंब केला जात असल्याने कर्मचाऱ्यांमध्ये तीव्र नाराजी निर्माण झाली आहे. गेली कित्येक महिने वेतन न मिळाल्याने या कर्मचाऱ्यांना विविध आर्थिक अडचणींचा सामना करावा लागत आहे. यासाठी आज जिल्हा परिषदसमोर जिल्ह्यातील शेकडो ग्रामपंचायत कर्मचारी एकवटले होते. जोपर्यंत वेतन देण्याची हमी प्रशासनाकडून दिली जात नाही, तोपर्यंत येथून जाणार नाही, असा पवित्रा त्यांनी घेतला होता.
जिल्हा परिषदेच्या मुख्य कार्यकारी अधिकाऱ्यांनी काल (ता.५) पत्रकार परिषद घेत ग्रामपंचायत कर्मचाऱ्यांच्या वेतनासाठी तसेच वेतनातील फरकाची रक्कम शासनाकडून प्राप्त झाली असून त्याचे वितरण सुरू असल्याचे म्हटले होते. मात्र, अद्यापही एकाही कर्मचाऱ्याच्या खात्यात वेतनाची किंवा फरकाची रक्कम जमा झाली नसल्याने आज आंदोलनासाठी कर्मचारी एकवटले होते. दरम्यान, प्रशासनाकडून ग्रामपंचायत कर्मचारी संघटनेला लेखी पत्र दिल्याने आंदोलन मागे घेण्यात आले. यावेळी ग्रामपंचायत कर्मचारी संघटनेचे अध्यक्ष विश्वनाथ परब, सचिव अभय सावंत, हनुमंत चव्हाण, संदीप सावंत, बाबू घाडी, मनोज सावंत आदी उपस्थित होते.
----------------
मंगळवारपर्यंत रक्कम खात्यात
जिल्हा परिषद मुख्य कार्यकारी अधिकाऱ्यांतर्फे मागील ३ महिन्यांचे थकीत वेतन मंगळवार (ता.१२) पर्यंत तर फरकाची ४ कोटी ६४ लाख ६० हजार ५५४ एवढी रक्कम दोन दिवसांत प्रत्येक कर्मचाऱ्याच्या खात्यावर वर्ग केली जाईल, असे लेखी पत्र ग्रामपंचायत कर्मचारी संघटनेला दिले.