82355

मालवणात महिलांसाठी नारळ लढविणे स्पर्धा
अरविंद मोंडकर ः शुक्रवारी ‘मालवणी संस्कृती’तर्फे आयोजन
सकाळ वृत्तसेवा
मालवण, ता. ५ : नारळी पौर्णिमा उत्सवानिमित्त मालवणी संस्कृती व वारसा मंडळ, मालवणतर्फे महिलांसाठी नारळ लढवणे स्पर्धा शुक्रवारी (ता. ८) सायंकाळी ४ वाजता बंदर जेटी येथे आयोजित करण्यात आली आहे. यंदा या स्पर्धेचे दहावे वर्ष असून विविध मान्यवरांच्या उपस्थितीत आणि सांस्कृतिक कार्यक्रमांनी दशकपूर्ती सोहळा साजरा होणार आहे. स्पर्धेतील विजेत्यांना सोन्या-चांदीचे दागिने, पैठणी, मोबाईल अशी आकर्षक बक्षिसे देण्यात येणार आहेत, अशी माहिती मंडळाचे अध्यक्ष अरविंद मोंडकर यांनी पत्रकार परिषदेत दिली.
बंदर जेटी येथील हॉटेल राजभोग येथे पत्रकार परिषद झाली. यावेळी बक्षिसांचे अनावरण करण्यात आले. देवानंद लुडबे, विद्या फर्नांडिस, रेश्मा नागवेकर, आर्या मुणगेकर, कोळंब सरपंच सिया धुरी, वायरी उपसरपंच प्राची माणगावकर, सायली मेथर, ॲड. अमृता मोंडकर, स्नेहल मेथर, पराग माणगावकर आदी उपस्थित होते.
श्री. मोंडकर म्हणाले, ‘‘२०१६ पासून आम्ही महिलांसाठी नारळ लढवणे स्पर्धा आयोजित करत आहोत. महिलांच्या सहकार्यामुळे आणि प्रोत्साहनामुळे ही दशकपूर्ती साजरी होत आहे. या सोहळ्यास विशेष अतिथी म्हणून पद्मश्री परशुराम गंगावणे, अभिनेते विरेश कांबळी व इतर मान्यवर उपस्थित राहणार आहेत. शुक्रवारी सायंकाळी ४ वाजता समुद्राला नारळ अर्पण झाल्यानंतर सिंधुकन्या फुगडी मंडळ (आडवण मालवण) यांचा सूप फुगडी कार्यक्रम, गोफ नृत्य सादरीकरण होईल. यानंतर महिलांसाठी नारळ लढवणे स्पर्धा होईल. त्यानंतर बक्षीस वितरण, लहान मुलांचे कोळी नृत्य, जादूगार निखिल यांचे जादूचे प्रयोग सादर होणार आहेत.’’
विजेत्या महिलांसाठी प्रथम पैठणी व सोन्याची नथ, सोबत १० लाखाचा विमा व आयुर्वेदिक स्किन केअर किट, द्वितीय पैठणी व सोन्याची नथ, सोबत १० लाखांचा विमा व आयुर्वेदिक स्किन केअर किट, तृतीय पैठणी व चांदीची पैंजण व आयुर्वेदिक स्किन केअर किट, चतुर्थ पैठणी, चांदीची पैंजण व आयुर्वेदिक स्किन केअर किट अशी पारितोषिके देण्यात येणार आहेत. स्पर्धेत सहभागी अथवा पाहण्यासाठी आलेल्या महिलांना सामाजिक संदेश असलेली कुपन देण्यात येणार असून, या कुपनद्वारे लकी ड्रॉ काढण्यात येतील.
लकी ड्रॉमधील विजेत्यास मोबाईल व इतरांना अन्य बक्षिसे देण्यात येईल. सर्व महिलांना आर्या हेल्थ क्लब मार्फत हेल्थ वर्क आउट ऑनलाईन लिंकद्वारे आरोग्य मार्गदर्शन करण्यात येईल. या स्पर्धेत सहभाग घेऊन कोणत्याही वर्षी मात्र तीन वेळा प्रथम क्रमांकाने जिंकलेल्या महिलेस विशेष प्राविण्य म्हणून ९ ग्रॅम सोन्याचा हार देण्यात येणार आहे. स्पर्धकांना नारळ मोफत दिले जातील. जास्तीत जास्त महिलांनी या स्पर्धेत सहभागी व्हावे, असे आवाहन मोंडकर यांनी केले.