‘कर्वे’ महिला महाविद्यालयाने
सैनिकांना पाठवल्या राख्या
रत्नागिरी ः शहराजवळील शिरगाव येथील महर्षी कर्वे महिला महाविद्यालयाच्या राष्ट्रीय सेवा योजना (एनएसएस) विभागातर्फे सैनिकांसाठी राख्या तयार करण्याचा उपक्रम राबवण्यात आला. या उपक्रमांतर्गत महाविद्यालयाच्या एनएसएस स्वयंसेविकांनी स्वहस्ते आकर्षक व प्रेमपूर्वक राख्या तयार केल्या असून, या राख्या ‘मराठा लाईट इन्फेन्ट्री’ या रेजिमेंट सेंटरला पोहोचवण्यात येणार आहेत. रक्षाबंधन हा भाऊ-बहिणीच्या अतूट नात्याचा पवित्र सण असतो. या दिवशी बहीण भावाला राखी बांधते व तिचे सदैव रक्षण करण्याचे वचन भाऊ तिला देत असतो. अशाच प्रकारे संपूर्ण देशाचे रक्षण करणाऱ्या सैनिकांप्रति कृतज्ञता व आदर व्यक्त करण्यासाठी हा उपक्रम राबवण्यात आला. स्वयंसेवकांनी आपली कला, भावना आणि देशभक्ती राख्यांद्वारे व्यक्त करत त्या राख्या तयार केल्या. या उपक्रमासाठी एनएसएस कार्यक्रम अधिकारी श्रुती यादव यांचे मार्गदर्शन लाभले. तयार झालेल्या सर्व राख्या जिल्हा सैनिक कल्याण कार्यालय, रत्नागिरी यांच्याकडे सुपूर्द करण्यात आल्या असून, त्यांच्यामार्फत या राख्या ''मराठा लाईट इन्फेन्ट्री'' या रेजिमेंटल सेंटरला पोहोचवण्यात येणार आहेत.

खेर्डी-टेरव रस्त्याची दुरवस्था
चिपळूण : खेर्डी ते टेरव मुख्य रस्त्याची दुरवस्था आणि रस्त्यावर पडलेले मोठे खड्डे यामुळे होणाऱ्या अपघाताचा व त्रासाचा प्रश्न गंभीर होत चालला आहे. या पार्श्वभूमीवर खेर्डी देऊळवाडी, कातळवाडी, बौद्धवाडी आणि खेर्डी गावातील ग्रामस्थांनी आज एकत्र येत चिपळूण येथील सार्वजनिक बांधकाम विभागाच्या कार्यालयात उपकार्यकारी अभियंता जी. एस. कुलकर्णी यांना निवेदन सादर केले. यानंतर ग्रामस्थांनी खेर्डी ग्रामपंचायतीत जाऊन उपसरपंच अभिजित खताते यांना देखील निवेदनाची एक प्रत सुपूर्द केली. ग्रामपंचायतीनेही रस्त्याच्या दुरुस्तीबाबत सार्वजनिक बांधकाम विभागाकडे तातडीने पाठपुरावा करण्याची मागणी केली असून, येणाऱ्या गणपती उत्सवाच्या पार्श्वभूमीवर रस्त्याचे काम त्वरित पूर्ण करण्यात यावे जेणेकरून ग्रामस्थांची गैरसोय होणार नाही, अशी ठाम मागणी करण्यात आली. या वेळी उपस्थित ग्रामस्थांमध्ये यशवंत लाड, सुनील गुरव, मंगेश पवार, सुप्रिया उतेकर, अनिल फाळके, महेंद्र फाळके, राजेंद्र भुरण, आनंद गुरव आदींचा समावेश होता.

तळे स्कूलमधील विद्यार्थिनींनी
पाठवल्या सैनिकांसाठी राख्या
खेड : तळे येथील सेकंडरी स्कूलमधील विद्यार्थिनींनी सैनिकांसाठी स्वतः तयार केलेल्या राख्या दी मराठा लाईट इन्फेन्ट्री रेजिमेंट सेंटर, बेळगाव येथे पाठवल्या आहेत. राष्ट्रीय हरितसेना विभागप्रमुख प्रशांत पंदेरे यांच्या पुढाकारातून ही संकल्पना यशस्वी करण्यात आली. या प्रसंगी माजी सैनिक मेजर मोरे यांनी आपले अनुभव कथन केले. या कार्यक्रमाला शाळा व्यवस्थापन समितीचे उपाध्यक्ष श्रीकांत शिर्के, प्राथमिक आरोग्यकेंद्राचे दीपक यादव, माजी विद्यार्थी व विविध समित्यांचे सदस्य, पालकवर्ग उपस्थित होते.