82508

विद्यार्थ्यांची कल्पकता; साकारली मराठी सणांची सृष्टी

कुडाळमधील ‘श्रावणधारा’; क.म.शि.प्र. इंग्रजी शाळेचा उपक्रम

सकाळ वृत्तसेवा
कुडाळ, ता. ६ ः येथील क.म.शि.प्र. मंडळाची इंग्रजी माध्यम प्राथमिक शाळेत श्रावणधारेतून विद्यार्थ्यांनी विविध सणांची सृष्टी साकारली. श्रावण महिना निसर्ग, सण, भक्ती आणि संस्कृतीचा संगम मानला जातो. या पार्श्वभूमीवर शाळेमध्ये ‘श्रावणधारा’ या विशेष कार्यक्रमाचे आयोजन करण्यात आले. विद्यार्थ्यांना आपले पारंपरिक सण व त्या सणांची माहिती समजावी, हा या कार्यक्रमाचा मुख्य हेतू होता.
या कार्यक्रमाच्या सजावटीतून श्रावणात पुजल्या जाणाऱ्या सर्व देवतांची चित्रे व मूर्त्या यांचे दर्शन घडविण्यात आले. श्रावणातील शाकाहारी व सात्विक आहार प्रत्यक्षरित्या केळीच्या पानात मांडून दाखविला. या कार्यक्रमातून विविध सांस्कृतिक कार्यक्रम सादर करण्यात आले. कार्यक्रमाची सुरुवात ईशस्तवन व स्वागत गीताने करण्यात आली. त्यानंतर उपस्थित मान्यवरांचे स्वागत करण्यात आले. त्यानंतर गणेश वंदना या कार्यक्रमाने ‘श्रावणधारा’ कार्यक्रमाचा आरंभ करण्यात आला. विद्यार्थ्यांनी श्रावण स्वागत गीताद्वारे वातावरण भक्तिमय केले.
श्रावणाचे महत्त्व सांगणारी भाषणे, पावसाळी गोष्ट आणि श्रावणातील विविध सणांची प्रात्यक्षिके व माहिती यांनी प्रेक्षकांना श्रावण महिन्याच्या विविध रंगांचा अनुभव मिळवून दिला. श्रावणातील प्रत्येक सणामागे काहीतरी गोष्ट आहे, हे विद्यार्थ्यांना या कार्यक्रमाच्या माध्यमातून समजले. सणांप्रमाणे केलेली वेशभूषा आणि त्या सणांची माहिती विद्यार्थ्यांनी अतिशय प्रभावीपणे मांडली. कार्यक्रमाच्या शेवटी विद्यार्थिनींनी पारंपरिक मंगळागौरचे खेळ, फुगडी, झिम्मा व उखाणे सादर करून वातावरणात उत्साह निर्माण केला. या कार्यक्रमाचे आयोजन प्रशालेच्या मुख्याध्यापिका मुमताज शेख यांच्या मार्गदर्शनाखाली करण्यात आले. प्रशालेच्या सहायक शिक्षिका दिव्या खानोलकर यांनी सूत्रसंचालन केले. सहायक शिक्षिका नेहा कुडाळकर, मिराली मयेकर, पूजा खानोलकर आदी उपस्थित होत्या.