-rat६p३.jpg-
२५N८२४७३
रत्नागिरी : पोमेंडीखुर्द येथील शाळेत निवृत्त तरी कार्यरत समूहातर्फे ऐतिहासिक चित्रांच्या वह्यांचे वितरणप्रसंगी विद्यार्थी, शिक्षक, सदस्य.
---
पाच शाळांमध्ये ऐतिहासिक चित्रांच्या वह्यांचे वितरण
‘निवृत्त तरी कार्यरत’ समूहाचा उपक्रम; गडकिल्ल्यांची चित्रे आणि माहिती
सकाळ वृत्तसेवा
रत्नागिरी, ता. ६ : राष्ट्रसेविका समितीच्या ‘निवृत्त तरी कार्यरत’ या समूहातर्फे शहर व ग्रामीण भागातील जिल्हा परिषदेच्या व खासगी शाळांमध्ये ऐतिहासिक चित्रांच्या वह्यांचे वितरण करण्यात आले. बसणी हायस्कूलसह सोमेश्वर, पोमेंडीखुर्द, मोर्डे, शिपोशी, धामणसे येथील शाळांमध्ये वितरण केले. वह्यांचे मुखपृष्ठावर छत्रपती शिवाजी महाराजांच्या गडकिल्ल्यांची चित्रे व त्यांची माहिती आतील पानावर दिली आहे, हे याचे वैशिष्ट्य़ आहे. विद्यार्थ्यांना व शिक्षकांना इतिहासाची गोडी निर्माण होण्यासाठी या वह्या उत्तम असल्याचे त्यांनी सांगितले. विद्यार्थ्यांनी ऐतिहासिक वास्तू शोधून त्याची माहिती गोळा करून आपले प्रकल्प करावे, चित्रे काढावीत. त्यामधून वेगवेगळ्या स्पर्धा घेण्यासाठी उपयोग करावा, असे आवाहन या समूहातर्फे करण्यात आले. कागल येथील स्वप्नील कारखानीस यांनी या वह्यांची निर्मिती केली आहे. या समूहातर्फे गेले तीन वर्ष विविध सामाजिक उपक्रम राबवले जात जातात. आपल्या बुद्धी, कौशल्याचा व वेळेचा उपयोग समाजासाठी व्हावा, असा उद्देश ठेवून या समूहाची स्थापना झाली. शहरातील विविध आस्थापनांमधून निवृत्त झालेल्या महिलांचा हा समूह आहे. सर्व शाळांमध्ये समूहाच्या सदस्यांनी जाऊन वह्यांचे वितरण केले. त्या वेळी शाळेतील मुलांनी गाणी, गोष्टी म्हणून वाद्ये वाजवून उत्स्फूर्त प्रतिसाद दिला. सर्व शाळांतील मुख्याध्यापक व शिक्षकांनी परत शाळेत कधीही येऊन मुलांजवळ अवश्य संवाद साधण्याचे निमंत्रण दिले.