82581

सुव्यवस्थेचा नवा अध्याय; ‘सावंतवाडी’साठी ११ नवी तलाठी कार्यालये

दीपक केसरकरांचा पुढाकार; ३ मंडल अधिकारी इमारतींसाठीही निधी मंजूर

सकाळ वृत्तसेवा
सावंतवाडी, ता. ६ ः आमदार दीपक केसरकर यांच्या पुढाकाराने सावंतवाडी, दोडामार्ग आणि वेंगुर्ले या तीन तालुक्यांमध्ये ११ नवीन तलाठी कार्यालये आणि ३ मंडल अधिकारी कार्यालयांच्या इमारती उभारण्यासाठी निधी मंजूर केला आहे. त्यामुळे या भागातील प्रशासकीय कामकाजाला मोठी चालना मिळणार आहे.
सावंतवाडी तालुक्यासाठी सर्वाधिक ६ तलाठी कार्यालये मंजूर झाली आहेत. ती माडखोल, दाणोली, सावंतवाडी शहर, इन्सुली, आरोंदा आणि तळवडे येथे उभारली जाणार आहेत. याशिवाय सावंतवाडी शहरासाठी एक मंडळ अधिकारी कार्यालय देखील मंजूर झाले आहे. दोडामार्ग तालुक्यात तळकट येथे एक तलाठी आणि एक मंडळ अधिकारी कार्यालय मंजूर झाले आहे. याव्यतिरिक्त झोळंबे, पिकुळे आणि सासोली येथेही नवीन तलाठी कार्यालयांच्या इमारती उभारल्या जाणार आहेत. वेंगुर्ले तालुक्यात आडेली आणि वेतोरे येथे तलाठी कार्यालयांच्या इमारतींना मंजुरी मिळाली आहे. वेतोरे येथे मंडळ अधिकारी कार्यालय देखील स्थापन होणार आहे.
-------
अडचणींमुळे इतर ठिकाणी मंजुरी रखडली
दरम्यान, दोडामार्ग व वेंगुर्ले तालुक्यात काही ठिकाणी ग्रामपंचायतीकडे जागा उपलब्ध नसल्याने कार्यालये उभारण्यात अडचणी येत आहेत. दोडामार्ग तालुक्यात साटेली भेडशी येथे तलाठी आणि मंडल अधिकारी कार्यालय तसेच वेंगुर्ले तालुक्यात म्हापण येथे मंडल अधिकारी कार्यालय जागा नसल्यामुळे मंजूर होऊ शकलेले नाही. तसेच, वजराट येथील तलाठी कार्यालयाला अद्याप मंजुरी मिळालेली नाही.