-rat६p१६.jpg-
P२५N८२५१९
पावस ः कोळंबे ग्रामपंचायत येथे कृषी विद्यापीठाच्या विद्यार्थ्यांनी दुग्धजन्य पदार्थांचे प्रात्यक्षिक दाखवले
------------
दुग्धजन्य पदार्थ बनवण्याचे प्रशिक्षण
कोळंबेत आयोजन ; महिलांचा सहभाग
सकाळ वृत्तसेवा
पावस, ता. ७ ः दापोलीतील कृषी महाविद्यालयांतर्गत घेतलेल्या ग्रामीण जागरूकता कार्यानुभव कार्यक्रमात रत्नागिरी तालुक्यातील कोळंबे येथील महिलांना दुग्धजन्य पदार्थ बनवण्याचे प्रशिक्षण देण्यात आले. हे प्रशिक्षण महाविद्यालयातील विद्यार्थ्यांच्या मृदासूत गटाने दिले.
कोळंबे येथे आयोजित प्रात्यक्षिकात पनीर, लस्सी, सुगंधी दूध (फ्लेवर्ड मिल्क) आणि पनीर बनवण्याच्या प्रक्रियेतून उत्पन्न झालेल्या निवळीचे पेय बनवण्याच्या पाककृतींचा समावेश होता. सार्थक दिवाळे यांनी उपस्थितांचे स्वागत करून कार्यक्रमाची सुरुवात केली. त्यानंतर राजवर्धन गायकवाड यांनी घरच्या घरी पनीर बनवण्याची प्रक्रिया सविस्तरपणे समजावून सांगितली. संकेत देशपांडे आणि प्रणव देसाई यांनी पनीर बनवण्याचे प्रात्यक्षिक सादर केले. त्यानंतर ओंकार फराडे यांनी लस्सी बनवण्याची प्रक्रिया समजावून सांगितली. लस्सी तयार करण्याचे प्रात्यक्षिक वेदांत गिरी आणि सुमीत भादवे यांनी करून दाखवले. त्यानंतर आकाश गावडे यांनी सुगंधी व्हॅनिला दूध बनवण्याची पाककृती सादर केली. यानंतर विजय दराडे आणि विपुल डोंगरकर यांनी व्हॅनिला दूध बनवण्याचे प्रात्यक्षिक सादर केले. या प्रात्यक्षिकात ३५ महिलांनी सहभाग घेतला होता.