- rat७p७.jpg -
२५N८२७३९
सावर्डे : सायबर गुन्हेगारी व सुरक्षा या विषयावर मार्गदर्शन करताना डॉ. अक्षय फाटक सोबत प्राचार्य कांबळे व इतर

सायबर गुन्हेगारीचे प्रमाण वाढतेय
डॉ. अक्षय फाटक ः सावर्डेत विद्यार्थ्यांना मार्गदर्शन
सकाळ वृत्तसेवा
सावर्डे, ता. ७: आजच्या डिजिटल काळात साक्षर लोकांमध्ये सायबर गुन्हेगारीचे प्रमाण वाढत चालले आहे. मोबाईल, संगणक, इंटरनेट व इतर डिजिटल माध्यमांतून होणारी सायबर गुन्हेगारी रोखायची असेल तर लोकांनी त्या संदर्भात सतर्कता बाळगण्याची परिणामी सुशिक्षित बनण्याची गरज आहे, असे प्रतिपादन डॉ. अक्षय फाटक यांनी केले.
सावर्डे येथील कला व विज्ञान महाविद्यालय, बीएससीआयटी महाविद्यालय व एनएसएस विभाग यांच्या संयुक्त विद्यमाने आयोजित ‘सायबर गुन्हेगारी व सुरक्षा’ या विषयावर ते बोलत होते. या प्रसंगी प्राचार्य टी. वाय. कांबळे यांनी डॉ. अक्षय फाटक यांचे स्वागत केले. कार्यक्रमाला बीएससीआयटीचे प्राचार्य एकनाथ गावडे, प्रा. वाघचौरे, डॉ. दीप्ती शेंबेकर, प्रा. जयसिंग चवरे, प्रा. पूजा आवले, प्रा. अवनी कदम उपस्थित होते.
सायबर सुरक्षेसंदर्भात विद्यार्थ्यांना मार्गदर्शन करताना डॉ. फाटक म्हणाले, आज प्रसारमाध्यमांमधून बनावट ई-मेल किंवा मेसेज पाठवून पासवर्ड चोरी, दुसऱ्याचे नाव व फोटो वापरून फेक खाते बनवणे, दुसऱ्याला ब्लॅकमेलिंग करून धमकी देणे, समाजात संभ्रम निर्माण करणारे संदेश प्रसारित करणे, अश्लील व्हिडिओ आणि ऑनलाइन फसवणुकीसारखे सर्रास प्रकार घडत आहेत. त्यामुळे लोकांनी वरील भूलप्रकारांना बळी न पडता याबाबतीत सजग राहून सोशल माध्यमांचा वापर आपल्या गरजेपुरता केला तरच आपण सायबर गुन्हेगारीला आळा घालू शकतो.
प्रास्ताविकात प्राचार्य कांबळे यांनी प्रमुख पाहुण्यांचा परिचय करून दिला. डिजिटल माध्यमांद्वारे होणाऱ्या सायबर गुन्हेगारीला आळा बसण्यासाठी लोकांमध्ये आणि तरुण पिढीमध्ये जागरूकता आणण्याच्या उद्देशाने या कार्यक्रमाचे आयोजन केले असल्याचे कांबळे यांनी सांगितले. कार्यक्रमाचे सूत्रसंचालन प्रा. सुनील जावीर यांनी केले तर आभार डॉ. शेंबेकर यांनी मानले.