पडवेकर, बुरबाडकरना समाजभूषण पुरस्कार
संत गोरा कुंभार मंडळ; रविवारी वार्षिक सभेत वितरण
सकाळ वृत्तसेवा
चिपळूण, ता. ७ ः संत गोरा कुंभार विकास मंडळ, खेर्डी यांच्यावतीने रविवारी (ता.१०) वार्षिक सर्वसाधारण सभेचे आयोजन केले आहे. या सभेत विष्णू पडवेकर आणि मनोहर बुरबाडकर यांना समाजभूषण पुरस्कार देऊन गौरवण्यात येणार आहे.
खेर्डी वरचीपेठ येथील संत शिरोमणी गोरोबाकाका सभागृहात सकाळी १० वाजता हा कार्यक्रम होणार आहे. या वेळी कुंभार समाजाच्या महाराष्ट्र महासंघाचे संस्थापक अध्यक्ष सतीश दरेकर, प्रदेशाध्यक्ष रमाकांत क्षीरसागर, महिला प्रदेशाध्यक्षा रसिका खेडेकर, महाराष्ट्र प्रदेश कार्याध्यक्ष महेश सायकर, युवा आघाडी अध्यक्ष संदीप पाटील, डॉ. सुरेश काळे आदी मान्यवर उपस्थित राहणार आहेत. या निमित्ताने विद्यार्थी गुणगौरव सोहळा होणार असून, गुणवंत विद्यार्थ्यांचा गौरव केला जाणार आहे. कोकण विभागात कुंभार समाजात ज्यांनी भरीव योगदान दिले अशा व्यक्तींचा कोकणरत्न व समाजभूषण पुरस्कार देऊन गौरव केला जाणार आहे. यावर्षीचा कोकणरत्न पुरस्कार हा सुरेश पालकर (गुहागर), अनंत महाडकर (रायगड), मोहन कुंभार (नवी मुंबई), भानुदास गोहेकर (पालघर), भास्कर कल्याणकर (ठाणे), नारायण साळवी (सिंदुधुर्ग), सुरेश बोरसे (मुंबई), सुभाष गुडेकर (रत्नागिरी), उमेश खैर (गुहागर) यांना देण्यात येणार आहे. या वेळी दुपारी २ वाजता कोकण विभागातील मान्यवरांसाठी चर्चासत्रही होणार आहे. समाजबंधूंनी या कार्यक्रमास उपस्थित राहावे, असे आवाहन संत गोरा कुंभार विकास मंडळाच्यावतीने करण्यात आले आहे.