83440

गवाणे शाळेत छत्र्या वाटप,
रक्षाबंधन सोहळा उत्साहात
सकाळ वृत्तसेवा
तळेरे, ता. ११ : गवाणे येथील जिल्हा परिषद पूर्ण प्राथमिक शाळेतील ४२ विद्यार्थी-विद्यार्थिनींना मोफत छत्री वाटप करण्याचा कार्यक्रम शाळेच्या सभागृहात उत्साहात झाला. यावेळी रक्षाबंधनाचा कार्यक्रमही घेण्यात आला. शाळेचे माजी विद्यार्थी जयवंत मालणकर यांच्या माध्यमातून छत्री वाटप करण्यात आले. अध्यक्षस्थानी केंद्रप्रमुख लहू दहिफळे, प्रमुख पाहुणे म्हणून माजी विद्यार्थी जयवंत मालणकर, शाळा समिती अध्यक्ष प्रकाश देवरुखकर, माजी सरपंच उमेश गवाणकर उपस्थित होते. सुमारे ४१ वर्षांपूर्वी सातवीत गवाणे-नाद केंद्रात प्रथम क्रमांकाने उत्तीर्ण झालेले मालणकर यांचा शाळेच्या वतीने सन्मान करण्यात आला. यावेळी मालणकर यांनी, नोकरीच्या मागे न लागता व्यावसायिक बना, असे आवाहन विद्यार्थ्यांना केले. विद्यार्थी-विद्यार्थिनींनी स्वतः राख्या बनवून त्यांचे प्रदर्शन भरविले. त्याचे उद्घाटन मालणकर यांच्या हस्ते झाले. मुख्याध्यापिका शेख यांनी आभार मानले.
...................
83441

शिडवणे क्र. १ शाळेत
रंगला रक्षाबंधन सोहळा
सकाळ वृत्तसेवा
तळेरे, ता. ११ : जिल्हा परिषद पूर्ण प्राथमिक शाळा शिडवणे क्र. १ शाळेत ‘शालेय रक्षाबंधन’ उत्साहात साजरा करण्यात आला. या कार्यक्रमात विद्यार्थिनींनी विद्यार्थ्यांना राख्या बांधून भाऊ-बहिणीच्या नात्याचा हा सण साजरा केला.
गेल्या ३० वर्षांहून अधिक काळ शिवराम जाधव यांच्या कुटुंबाकडून या कार्यक्रमासाठी आर्थिक मदत दिली जाते. यावर्षीही त्यांच्या मदतीने हा दिवस साजरा करण्यात आला. रक्षाबंधनाचे औचित्य साधून शालेय पोषण आहारात गोड खाऊ म्हणून शिरा देण्यात आला. मुख्याध्यापक प्रवीण कुबल, उपमुख्याध्यापिका सीमा वरुणकर, उपशिक्षक सुरेंद्र यादव, अंगणवाडी सेविका प्रियांका पाटणकर, शालेय पोषण आहार सेविका समिता सुतार उपस्थित होते. शाळेच्या वतीने देणगीदार शिवराम जाधव कुटुंबाचे आभार मानण्यात आले.