माकडांच्या त्रासामुळे
शेतकरी हैराण
खेड ः कोकणातील अनेक गावांमध्ये माकडांचा प्रचंड त्रास वाढला असून, त्यामुळे स्थानिक शेतकऱ्यांचे शेती व फळबागांचे मोठ्या प्रमाणात नुकसान होत आहे. नारळ, पोफळी, आंबा, केळी यांसारख्या पिकांवर वारंवार माकडांचे हल्ले होत असून, शेतकऱ्यांचे आर्थिक नुकसान दिवसेंदिवस वाढत आहे. याशिवाय माकडांच्या टोळ्यांमुळे घरांचे कौले, भाज्या, फळे आणि खिडक्या-दारांचेही नुकसान होत आहे. त्यामुळे ग्रामीण भागातील नागरिकांचा मानसिक त्रास वाढला असून, शेतकरी हवालदिल झाले आहेत. या पार्श्वभूमीवर ‘कोंकण विकास समिती’चे संस्थापक अध्यक्ष जयवंत दरेकर यांनी जिल्हाधिकाऱ्यांना निवेदन देऊन या समस्येकडे लक्ष देण्याची मागणी केली आहे. प्रभावित गावांमध्ये वनविभागामार्फत पाहणी व कार्यवाही आवश्यक असल्यास माकडांचे पुनर्वसन, नुकसानीसाठी नुकसानभरपाई व आर्थिक मदत स्थानिक शेतकरी व संघटनांसोबत बैठक घेऊन ठोस धोरण ठरवण्यासाठी नियोजन करण्याची मागणी करण्यात आली आहे.

डेरवणमध्ये १९ ला
क्रॉसकंट्री स्पर्धा
सावर्डे ः डेरवण येथे १९ ऑगस्टला सकाळी ८ वाजता क्रॉस कंट्री स्पर्धेचे आयोजन करण्यात आले आहे. या स्पर्धेदरम्यान विजेत्या खेळाडूंना एकूण ५५ हजार रुपयांची रोख पारितोषिके, पदके आणि प्रशस्तिपत्रके देऊन गौरवण्यात येणार आहे. स्पर्धा १२, १४, १६, १८ वर्ष वयोगटातील मुले व मुलींसाठी आयोजित केली आहे. जास्तीत जास्त खेळाडूंनी या स्पर्धेत सहभाग नोंदवून बलोपासना आणि शारीरिक तंदुरुस्तीच्या या उपक्रमात सहभागी व्हावे, असे आवाहन संस्थेमार्फत करण्यात आले आहे. स्पर्धेतील आपला सहभाग नोंदवण्याची अंतिम तारीख १७ ऑगस्ट आहे.