83786

‘वैभववाडी’ आराखड्यास नागरिकांचा विरोध

बैठकीत मांडली भूमिका; रद्द न केल्यास आंदोलनाचा इशारा

सकाळ वृत्तसेवा
वैभववाडी, ता. ११ ः वाभवे वैभववाडी शहराच्या नगरविकास प्रधिकरणने तयार केलेल्या आराखड्यामुळे शहरातील बाजारपेठच उद्ध्वस्त होत असून, चुकीच्या पद्धतीने हा आराखडा तयार केला आहे. हा आराखडा रद्द करण्यात यावा; अन्यथा आंदोलन छेडण्यात येईल, असा इशारा नागरिकांनी दिला आहे.
येथील श्री देवी आदिष्टी मंदिरात रविवारी (ता.१०) रात्री शहरातील नागरिकांची बैठक झाली. या बैठकीला उपनगराध्यक्ष प्रदीप रावराणे, बांधकाम सभापती रणजित तावडे, माजी नगराध्यक्ष रवींद्र रावराणे, रत्नाकर कदम, बाबा तावडे, दीपक माईणकर, संतोष माईणकर, सुरेंद्र रावराणे, नारायण मांजरेकर, नाना तांबे, दत्ताराम कदम, वैभव सावंत, गणेश रावराणे, बाळा इदंप आदी उपस्थित होते.
बैठकीत नगरविकास प्रधिकरणने तयार केलेल्या विकास आराखड्याबाबत चर्चा करण्यात आली. शहरातील अनेक घरे, अकृषक जमिनी आरक्षित करण्यात आल्या आहेत. ज्या ठिकाणी आठ ते नऊ मीटर रस्त्यांची गरज आहे, तेथे ३० मीटर, ६० मीटर, १२ मीटर रस्त्यांचा आराखड्यात समावेश आहे. उबंर्डे-फोंडा रस्ता ३० मीटरचा आराखड्यात आहे. या रस्त्यामुळे संपूर्ण बाजारपेठ उद्ध्वस्त होणार आहे. आराखड्यात ५८ टक्के ग्रीन झोनचा समावेश आहे. वाडीवस्ती असलेल्या ठिकाणी ग्रीन झोन आहे. शहराचा कसलाही अभ्यास न करता आणि कुणालाही विश्वासात न घेता हा आराखडा तयार करण्यात आला आहे. त्यामुळे तो रद्द करण्यात यावा; अन्यथा या विकास आराखड्याविरोधात आंदोलन छेडण्याचा निर्णय बैठकीत घेण्यात आला.
वैभववाडी शहराची लोकसंख्या, या शहराचा होणारा संभाव्य विकास या सर्वांचा विचार करून आराखडा होणे आवश्यक होते; परंतु कसलाही विचार हा आराखडा तयार करताना केलेला दिसत नाही. शहरातील नागरिकांना विश्वासात घेऊन चांगला विकास आराखडा तयार करण्यात यावा, अशी मागणी देखील या बैठकीत नागरिकांनी केली. शहराच्या विकासाकरिता अनावश्यक जागा देखील निश्चित करण्यात आलेल्या आहेत. त्याचा देखील पुनर्विचार करण्यात यावा, असे नागरिकांनी बैठकीत सांगितले.
.....................
संभाव्य रस्त्यांमुळे घरांना धोका
नगरविकास प्रधिकरणने तयार केलेल्या संभाव्य आराखड्यातील रस्त्याची अंमलबजावणी झाल्यास अनेक घरे कोसळावी लागतील. त्यामुळे नागरिकांना उद्ध्वस्त करणारा विकास आराखडा आम्हाला नको, असा बैठकीत सर्वांचा सूर होता.