विक्रेते, हॉटेल व्यावसायिकांनी दक्षता घ्या
नि. दि. मोहिते ः अन्न व औषध प्रशासनाकडून सूचना
सकाळ वृत्तसेवा
रत्नागिरी, ता. १२ ः अन्नपदार्थ ग्राहकांना देताना त्याच्या पॅकिंगसाठी वर्तमानपत्राचा वापर करू नये, मिठाई बनवताना केवळ फूडग्रेड खाद्यरंगाचा अत्यल्प प्रमाणात वापर करावा, सणासुदीच्या काळात मिठाई व इतर अन्नपदार्थांच्या सेवनामुळे विषबाधासारखी अप्रिय घटना घडणार नाही याची जिल्ह्यातील मिठाई उत्पादक, विक्रेते व हॉटेल व्यावसायिकांनी दक्षता घ्यावी, असे आवाहन अन्न व औषध प्रशासन साहाय्यक आयुक्त नि. दि. मोहिते यांनी केले आहे. अन्नपदार्थाच्या दर्जाविषयी ग्राहकांनी तक्रार करावी, असेही त्यांनी सांगितले.
मिठाई बनवण्यासाठी वापरला जाणारा आस्थापनेचा परिसर संरक्षित व स्वच्छ असावा. कच्चे अन्नपदार्थ परवानाधारक किंवा नोंदणीधारक अन्न व्यावसायिकांकडून खरेदी करण्यात यावेत. अन्नपदार्थ तयार करण्यासाठी पिण्यायोग्य पाण्याचा वापर करावा, पाणी पिण्यायोग्य असल्याबाबत अहवाल प्राप्त करून घ्यावा, तयार अन्नपदार्थ हे स्वच्छ व सुरक्षित ठिकाणीच व्यवस्थित झाकून ठेवावेत. जिल्ह्यातील मिठाई उत्पादक, विक्रेते व हॉटेल व्यावसायिकांनी सर्व सूचनांचे पालन करावे आणि सणासुदीच्या काळात मिठाई व इतर अन्नपदार्थांच्या सेवनामुळे विषबाधासारखी अप्रिय घटना घडणार नाही याची सर्वांनी दक्षता घ्यावी, असे आवाहन अन्न व औषध विभागाकडून करण्यात आले आहे.

चौकट
कोणती काळजी घ्यावी
आजारी व्यक्तीने अन्नपदार्थ हाताळू नये. मिठाई तयार करताना केवळ फूडग्रेड खाद्यरंगाचा अत्यल्प प्रमाणात वापर करावा. अन्नपदार्थ ग्राहकांना देताना अन्नपदार्थ पॅकिंग करताना वर्तमानपत्राचा वापर करू नये. बंगाली मिठाई ही २४ तासांच्या आत खाण्याबाबत ग्राहकांना स्पष्ट निर्देश देण्यात यावेत. मिठाईवर वापरला जाणारा सोनेरी व चांदीचा वर्ख योग्य दर्जाचा व उच्च प्रतीचा असावा, याची काळजी उत्पादकांनी घ्यावी.

चौकट
अन्न हाताळणाऱ्यांची तपासणी करा
मिठाई हाताळताना हात वारंवार स्वच्छ धुवावेत. अन्न व्यावसायिकांनी त्यांच्या आस्थापनेचे पेस्ट कंट्रोल करून घ्यावे व त्याचा अभिलेखा ठेवावा. आस्थापनेत कार्यरत अन्न हाताळणाऱ्या व्यक्तीची वैद्यकीय तपासणी करून घ्यावी व त्याचा अभिलेखा ठेवावा, अशी सूचना साहाय्यक आयुक्त मोहिते यांनी केली आहे.