आडवली येथील बैठकीत
भाजपचा विजयाचा निर्धार
मालवण, ता. १२ : तालुक्यातील भाजपच्या आडवली जिल्हा परिषद मतदारसंघाची महत्त्वपूर्ण बैठक आज पार पडली. आगामी जिल्हा परिषद निवडणुकीत विजय मिळवण्याचा निर्धार या बैठकीत उपस्थित पदाधिकारी, कार्यकर्त्यांनी केला.
या बैठकीत महिला कार्यकर्त्यांनी रक्षाबंधनानिमित्त मुख्यमंत्री देवेंद्र फडणवीस यांच्यासाठी पाठविलेल्या राख्या भाजपचे तालुकाप्रमुख धोंडी चिंदरकर यांच्याकडे सुपूर्द केल्या. यावेळी मतदारसंघातील सर्व कार्यकर्त्यांनी भाजपच्या पाठीशी खंबीरपणे उभे राहण्याचा निर्धार व्यक्त केला. या बैठकीला कार्यकर्त्यांची उत्स्फूर्त उपस्थिती लाभली. यावेळी तालुकाप्रमुख धोंडी चिंदरकर, गजू बाकरे, मंदार केणी, राजू परुळेकर, महेंद्र चव्हाण, प्रवीण घाडीगावकर, नितीन पवार, राजेश तांबे, श्री. बापट आदी उपस्थित होते.
...................
शैक्षणिक कर्ज योजनेसाठी
‘नॉन क्रिमिलेयर’ आवश्यक
सिंधुदुर्गनगरी, ता. १२ ः शामराव पेजे कोकण इतर मागासवर्ग आर्थिक विकास महामंडळ व सर्व उपकंपन्यांमार्फत (ओबीसी महामंडळ) राबविण्यात येत असलेल्या शैक्षणिक कर्ज व्याज परतावा योजनेमध्ये अर्ज सादर करतेवळी कौटुंबिक वार्षिक उत्पन्न मर्यादा ग्रामीण व शहरी भागासाठी ८ लाखांपर्यंत सक्षम प्राधिकरणाने दिलेला दाखला सादर करावा लागत असे. या बदल्यात शासन शुद्धीपत्रकानुसार लाभार्थीने ग्रामीण व शहरी भागाकरीता कौटुंबिक वार्षिक उत्पन्नांसदर्भात नॉन क्रिमिलेयर प्रमाणपत्र सादर करणे बंधनकारक केल्याची माहिती जिल्हा व्यवस्थापक प्रिती पटेल यांनी दिली आहे. अर्ज सादर करणाऱ्या उमेदवाराला महामंडळाकडून शैक्षणिक अभ्यासक्रम सुरू असेपर्यंत बॅंकेमार्फत दिलेल्या कर्जावरील व्याज भरल्यास व्याज परताव्याचा लाभ घेता येईल. यासाठी महामंडळाच्या संकेतस्थळावर अर्ज सादर करावेत किंवा जिल्हा कार्यालय डॉ. बाबासाहेब आंबेडकर सामाजिक न्यायभवन, सिंधुदुर्गनगरी या पत्त्यावर संपर्क साधावा, असे आवाहन केले आहे.