ध्वजवंदनासह आज विविध कार्यक्रम
सकाळ वृत्तसेवा
चिपळूण, ता. १४ ः देशाच्या स्वातंत्र्यदिनाला ७८ वर्षे पूर्ण होत असून, शाळा-महाविद्यालयांमध्ये १५ ऑगस्ट रोजी ध्वजवंदन कार्यक्रमांसह विविध सांस्कृतिक कार्यक्रमांचे आयोजन करण्यावर भर दिला आहे. त्यामुळे शासकीय कार्यालयांसह शाळा-शाळांमध्ये लेझिम, ढोल, झांजेचा आवाज घुमू लागला आहे.
शासकीय-निमशासकीय कार्यालये, सहकारी संस्था, स्थानिक स्वराज्य संस्थांमध्ये उद्या सकाळी ध्वजवंदनाचे नियोजन करण्यात येत आहे. शाळा-महाविद्यालयांमध्ये विविध कार्यक्रम घेण्यात येत आहेत. यावर्षीही विद्यार्थ्यांच्या कवायती तसेच सांस्कृतिक कार्यक्रमही सादर करण्यात येणार आहेत. शाळा परिसर तसेच ग्रामीण भागात विद्यार्थ्यांचे संचलन करण्यात येते. त्यासाठी विद्यार्थ्यांकडून कसून सराव करून घेतला जात आहे. प्रांताधिकारी आकाश लिंगाडे यांच्या दालनात दोन दिवसांपूर्वी स्वातंत्र्यदिनाच्या नियोजनाची बैठक झाली. त्यानंतर शाळा, महाविद्यालय आणि विविध शासकीय कार्यालयातील अधिकारी-कर्मचाऱ्यांनी तिरंगा रॅली काढली. उद्या प्रांताधिकारी कार्यालय आणि चिपळूण पालिकेसमोर ध्वजवंदन कार्यक्रम होणार आहे.