swt1427.jpg
84500
सुकळवाड ः येथील जीर्ण साकव धोकादायक बनला आहे.

सुकळवाड येथील धोकादायक
साकवाच्या दुरुस्तीची मागणी
सकाळ वृत्तसेवा
सिंधुदुर्गनगरी, ता. १४ ः सुकळवाड (ता. मालवण) येथे शामी दाभोलकर बागेजवळील ओढ्यावर अनेक वर्षांपूर्वी बांधण्यात आलेला काँक्रिट साकव जीर्ण झाला आहे. या धोकादायक साकवाची तातडीने दुरुस्ती करावी, अशी मागणी सुकळवाड गावराई पंचक्रोशी ग्रामस्थांनी केली आहे. सुकळवाड बाजारपेठ नजीक ओढ्यावर शामी दाभोलकर बागेजवळ गेल्या अनेक वर्षांपूर्वी काँक्रिट साकव बांधण्यात आला. या साकवावरून गावराई तिरवडे व आजूबाजूच्या परिसरातील ग्रामस्थ व शेतकरी यांच्यासाठी सुकळवाड बाजारपेठेत जाण्यासाठी रहदारीचा मार्ग आहे. हा साकव जीर्ण झाल्याने पूर्ण निकामी बनला आहे. या साकवाला पायऱ्या नसल्याने व चालण्यासाठी रॅम्प असल्याने पावसामुळे होणारे शेवाळ पादचाऱ्यांना धोकादायक ठरत आहे. यामुळे अनेक जण घसरून पडून अपघातही घडले आहेत. या साकवाची दुरुस्ती करावी, अशी मागणी ग्रामस्थांनी केली आहे. शासनाच्या साकव दुरुस्ती कार्यक्रमामध्ये पालकमंत्र्यांनी दिलेल्या सुचनेनुसार मालवण सार्वजनिक बांधकाम अखत्यारित येणारा हा धोकादायक साकव दुरुस्तीसाठी आराखडयात समाविष्ट करून बांधकाम विभागाने या साकवाची दुरुस्ती करावी, अशी मागणी होत आहे.