84510

‘बांदा रोट्रॅक्ट’तर्फे शालेय साहित्य वाटप
बांदा ः रोट्रॅक्ट क्लब ऑफ रायझिंग युथ बांदातर्फे सामाजिक बांधिलकी जपत सरस्वती विद्या मंदिर, कुडासे (ता. दोडामार्ग) येथील गरजू विद्यार्थ्यांना शालेय साहित्याचे वाटप केले. रोट्रॅक्ट क्लब अध्यक्ष रोहन कुबडे यांनी शिक्षणाचे महत्त्व, स्वप्ने पूर्ण करण्यासाठी परिश्रमाची गरज आणि वेळेचे नियोजन याबाबत मार्गदर्शन केले. त्यांनी विद्यार्थ्यांना आत्मविश्वासाने पुढे जाण्याचे आणि आव्हानांना सामोरे जाण्याचे आवाहन केले. विद्यार्थी मंचाचे अभिजित सिनारी, मुख्याध्यापक शेणगे, रोट्रॅक्टचे उपाध्यक्ष दत्तराज चिंदरकर, ईश्वरी कल्याणकर, पूजा चव्हाण, दिया गायतोंडे, ओंकार पावसकर, आयुष गवस आदी उपस्थित होते.
...................
84511
आकेरी शाळेत संत ज्ञानेश्वरांना वंदन
सावंतवाडी ः संतश्रेष्ठ श्री ज्ञानेश्वर महाराज यांच्या शतकोत्तर सुवर्ण महोत्सवी जयंती वर्षानिमित्ताने आकेरी क्र. १ प्रशालेत विविध कार्यक्रम झाले. दीपप्रज्वलन, संत ज्ञानेश्वरांच्या प्रतिमेचे पूजन, ज्ञानेश्वरांची वेशभूषा, ज्ञानेश्वरांच्या प्रतिमेचा पालखी सोहळा, पसायदानाचे सामुदायिक गायन आदी कार्यक्रमांचा यात समावेश होता. संत ज्ञानेश्वरांची वेशभूषा वेदांत नाईक याने साकारली. त्यासाठी त्याचे पालक लक्ष्मीकांत नाईक यांनी परिश्रम घेतले. उपसरपंच गुरुनाथ पेडणेकर, ग्रामसेविका श्रीमती राऊळ आदी उपस्थित होते. यावेळी ‘हर घर तिरंगा’ अंतर्गत प्रभात फेरीचे आयोजन केले होते.