Rat१४p७.jpg -
P२५N८४४१०
मंडणगड: न्यायालयाच्या इमारतीचे सुरू असलेले काम.

मंडणगड न्यायालय इमारतीचे उद्‍घाटन लांबले
लक्ष्य गाठण्यात अपयश; काम पूर्ण नसताना अट्टहास कोणाचा?
सकाळ वृत्तसेवा
मंडणगड, ता.१४ ः पावसाळ्यातील आपत्तकालीन परिस्थितीवर मात करत कुठल्याही परिस्थितीत मंडणगड येथील कनिष्ठ दिवाणी न्यायालयाच्या नवीन इमारतीचे उद्‍घाटन १६ ऑगस्ट रोजी करण्याचे यंत्रणेने निर्धारित केलेले लक्ष्य गाठण्यात अपयश आले आहे. न्यायालयाच्या नवीन इमारतीच्या उद्‍घाटनाचा मुहूर्त तूर्तास लांबणीवर पडला आहे. भरपावसात इमारतीचे काम पूर्ण नसताना उद्‍घाटनाचा अट्टहास कोणी व का केला, असा प्रश्न तालुकावासियांसमोर निर्माण झाला आहे. गेल्या एक महिन्यापासून न्यायपालिकेसह सर्वच यंत्रणांनी याकरिता कंबर कसून काम केले होते. शेवटच्या टप्प्यात सहाशेहून अधिक कुशल व अकुशल कामगार दिवस-रात्र काम पूर्ण करण्यासाठी झटत होते. कामाचे नियोजन व या निमित्ताने देशाचे सरन्यायाधीश व मुख्यमंत्री यांच्यासह तालुक्यात अतिमहत्त्वाच्या व्यक्ती येणार आहेत. दौऱ्याकरिता प्रत्यक्ष काम करणाऱ्यांपेक्षा पाहणी करणाऱ्यांची संख्या अधिक होती. वरिष्ठ पातळीवर सर्वच यंत्रणा गेल्या दहा दिवसापासून तालुक्यात डेरेदाखल झालेली होती. कार्यक्रमासंदर्भात कुठलीही अधिकृत घोषणा कुठल्याही यंत्रणेने केलेली नसली तरी सर्व काम वरून आलेल्या आदेशान्वये सुरू होते.
उद्‍घाटन सोहळ्यासाठी व ऐतिहासिक क्षणाचे साक्षीदार होण्यासाठी इच्छुकांची निराशा झाली आहे. तयारीच्या कामात दिवस-रात्र मेहनत करणाऱ्या अनेकांची मेहनत व्यर्थ गेली आहे. अथक प्रयत्नानंतरही इमारतीकडे जाणारा रस्ता, इमारतीची सुरक्षाभिंत, हेलिपॅड ते इमारत रस्ता, इमारतीची दर्शनी बाजूंची सर्व कामे अपूर्ण राहण्याची शक्यताच या पार्श्वभूमीवर हा निर्णय घेण्यात आला का, याबद्दल काहीही सांगण्यात आले नाही.
---
चौकट
पावसाने साथ देऊनही अपयश
गतवर्षीच्या सरासरीच्या साधारण 25 टक्के इतके कमी पर्जन्यमान यंदा तालुक्यात झाले आहे. म्हणजेच पावसाने परिपूर्ण साथ दिलेली असतानाही काम पूर्ण करण्यात यश मिळाले नाही, असे का झाले? याचा अभ्यास या निमित्ताने होणे गरजेचे आहे. घाईगडबडीने उद्‍घाटन करण्याच्या प्रयत्नात मोठे मनुष्यबळ यंत्रणा कामास लागली त्याकरिता मोठ्या प्रमाणात निधी ही खर्ची पडला; पण फलित काहीच नसल्याची चर्चा सुरू आहे.