- rat14p5.jpg- चिपळूण ः येथे झालेल्या पत्रकार परिषदेत बोलताना मत्स्यविभाग मंत्री नितेश राणे.

प्रशांत यादव भाजपत प्रवेश करणार
१९ ऑगस्टला सोहळा; नितेश राणे यांची घोषणा
सकाळ वृत्तसेवा
चिपळूण, ता.14 : रत्नागिरी जिल्ह्यातील वजनदार नेते आणि शरद पवार राष्ट्रवादी काँग्रेसचे प्रशांत यादव लवकरच भारतीय जनता पक्षात (भाजप) प्रवेश करणार आहेत. त्यांच्या प्रवेशाची औपचारिक घोषणा राज्याचे मत्स्यविभाग मंत्री आणि रत्नागिरी जिल्ह्याचे संपर्कमंत्री नितेश राणे यांनी पिंपळी येथील वाशिष्ठी डेअरीमध्ये आयोजित पत्रकार परिषदेत केली.
राणे म्हणाले, यादव रत्नागिरी जिल्ह्यातील मोठे नेतृत्व आहे. कार्यकर्ता म्हणून नाही तर नेते म्हणून आम्ही त्यांच्याकडे पाहतो. वाशिष्ठी डेअरीच्या माध्यमातून त्यांनी मोठं काम केलं आहे, अनेकांना रोजगार दिला आहे. सहकाराच्या क्षेत्रातही त्यांचे मोठे योगदान आहे. त्यामुळे असा नेता आमच्या पक्षात आला तर निश्चितच आम्हाला फायदा होईल. भाजपात यादवांचा प्रवेश १९ ऑगस्ट रोजी नरिमन पॉइंट येथील भाजप प्रदेश कार्यालयात होईल. या वेळी मुख्यमंत्री देवेंद्र फडणवीस, प्रदेशाध्यक्ष रवींद्र चव्हाण, खासदार नारायण राणे आणि इतर नेते उपस्थित राहणार आहेत.
राणे यांनी सांगितले, पालकमंत्री उदय सामंत हे आमच्या मतदार संघातील ज्येष्ठ मंत्री आहेत. प्रत्येकाला पक्ष वाढवण्याचा अधिकार आहे; परंतु यादव यांनी योग्यता पाहून निर्णय घेतला. १९ तारखेला त्यांच्या प्रवेशसोहळ्यातून संघटना अधिक भक्कम होईल. त्यांचे कार्यकर्त्यांचे जाळं मोठं असून, ते तळागाळापर्यंत पोहोचले आहे. आमदार शेखर निकम हे आपल्याच महायुतीत आहेत, याबाबत विचारले असता प्रत्येकाला पक्ष वाढवण्याचा अधिकार आहे. आम्ही स्वबळावर लढलो तरच आमची ताकद वाढेल, असेही ते म्हणाले. या वेळी उपस्थित माजी आमदार डॉ. विनय नातू, जिल्हाध्यक्ष सतीश मोरे, राजेश सावंत, चिपळूण नागरी सहकारी पतसंस्थेच्या मुख्य कार्यकारी अधिकारी स्वप्ना यादव यांच्यासह नेते आणि कार्यकर्तेदेखील उपस्थित होते.

--------
कोट

महाविकास आघाडीकडून गत विधानसभेची निवडणूक लढवताना थोड्या मतांनी पराभव स्वीकारावा लागला. या पराभवानंतर गेल्या वर्षभरात आपल्या कार्यकर्त्यांमध्ये काहीशी अस्वस्थता पसरली होती. कार्यकर्त्यांमध्ये पुढे वाटचाल करण्याच्यादृष्टीने दिशा देण्याची गरज होती. बदलती राजकीय समीकरणे आणि स्थित्यंतरे, भविष्यातील कार्यकर्त्यांच्या बाबतीतला दृष्टिकोन याचा सारासार विचार करून आपण भाजपमध्ये प्रवेश करण्याचा निर्णय घेतला आहे.
- प्रशांत यादव, उद्योजक - चिपळूण