rat17p26.jpg-
85025
गोकुळगाव : मंडणगडच्या प्रेमात पडलेले डॅनियल डीसोजा व त्यांचे कुटुंबीय.
--------------
सिनेकलाकार डिसोजांची मंडणगडशी जोडली नाळ
संस्कृती, परंपरा भावली ; स्थानिकांना रोजगार निर्मितीसाठी प्रयत्नशील
सकाळ वृत्तसेवा
मंडणगड, ता. १७ ः जमिनीच्या शोधात मंडणगड तालुक्यात आलेले नृत्य दिग्दर्शक व सिने कलाकार डॅनियल डीसोजा व त्यांच्या कुटुंबीयांची गेल्या चार वर्षापासून तालुक्याशी नाळ जोडली गेली आहे. स्थानिक पातळीवर रोजगार व स्वयंरोजगार उपलब्ध व्हावा, गावातील बंद पडत चाललेली तालुक्यातील घरे, पुन्हा सुरू व्हावीत यासाठी ते प्रयत्नशील असल्याचे त्यांनी पत्रकारांशी बोलताना सांगितले.
ते म्हणाले, येथील माणसे येथील संस्कृती व प्रथा पंरपरा व प्रामुख्याने येथील पर्यावरण आवडले असून मन तालुक्याशी एकरुप झाले आहे. येथील सार्वजनीक सणांना परंपरा भावली आहे. त्यामुळे गोकुळगाव येथे दरवर्षी दहीहांडी आयोजन करण्यास सुरुवात केली आहे. येथील माणसांनी त्यांना भरभरून आपुलकी व प्रेम दिल्याचे सांगितले. मुले सांभाळ करीत नसलेल्या वृद्धांसाठी निवारा उभारण्याचे कामात ते सध्या व्यस्त आहेत. एका अनाथ मुलापासून जीवनाचा संघर्ष सुरू केलेल्या डिसोजा यांनी लौकीक जीवनात संघर्ष करुन नृत्य अभियानासह जीवनातील विविध क्षेत्रे स्व कतृत्वाने पादांक्रांत केली आहेत.
तालुक्यातील तरुणांसाठी इथेच काही करता का येत नाही हा प्रश्न त्यांना नेहमीच सतावत असतो. या प्रश्नाचे उत्तर शोधण्यासाठी डिसोजा यांनी मंडणगडची निवड केल्याचे सांगितले. केवळ गणपती, शिमगा व मे महिन्याच्या सुट्टीला गावी यायचे ही मानसिकता कमी करून गावातच काही करता येईल का यासाठी पर्यटन, शेती या विषयामध्ये इतरांना मार्गदर्शक ठरतील असे प्रयोग डिसोजा यांनी सुरू केले असून काही वर्षांनी पूर्णवेळ मंडणगडमध्ये राहून सामाजिक कार्य करण्याचे नियोजन असल्याचे सांगितले.