85327

भाजपची जम्बो कार्यकारिणी जाहीर

२०० जणांचा समावेश; जुन्या पदाधिकाऱ्यांसह नव्यांना संधी

सकाळ वृत्तसेवा
सिंधुदुर्गनगरी, ता. १८ ः जिल्हा भाजपची २०२५ ते २०२८ या तीन वर्षासाठी २५ प्रमुख पदधिकाऱ्यांसह तब्बल २०० जणांचा समावेश असलेली जम्बो जिल्हा कार्यकारिणी आज जिल्हाध्यक्ष प्रभाकर सावंत यांनी पत्रकार परिषदेत जाहीर केली.
भाजप प्रदेशाध्यक्ष रवींद्र चव्हाण यांच्या मान्यतेने तसेच खासदार नारायण राणे, पालकमंत्री नीतेश राणे, संघटन मंत्री शैलेंद्र दळवी यांच्या मार्गदर्शनानुसार आज श्री. सावंत यांनी सिंधुदुर्ग जिल्ह्याची नूतन जिल्हा कार्यकारिणी जिल्हा भाजप कार्यालयात पत्रकार परिषद घेऊन जाहीर केली. यावेळी भाजपचे जिल्हा सरचिटणीस रणजीत देसाई, महेश सारंग, महिला जिल्हाध्यक्ष श्वेता कोळगावकर, संदीप मेंस्त्री, जिल्हा बँक अध्यक्ष मनीष दळवी उपस्थित होते.
श्री. सावंत म्हणाले, ‘‘२०२५ ते २०१८ या तीन वर्षाच्या कालावधीसाठी जाहीर केलेल्या कार्यकारणीमध्ये जुन्या पदाधिकाऱ्यांसह काही नव्या चेहऱ्यांना संधी दिली आहे. या नवीन कार्यकारणीमध्ये जिल्हाध्यक्ष म्हणून कायम असून उपाध्यक्षपदी प्रमोद रावराणे, अशोक सावंत, प्रसन्ना देसाई, अनिल सावंत, संदीप गावडे, संजना सावंत, संध्या तेरसे, सुषमा खानोलकर, प्रमोद कामत, संदीप परब यांची तर सरचिटणीसपदी महेश सारंग, रणजित देसाई, संदीप साटम, शारदा कांबळे यांचा समावेश आहे. याव्यतिरिक्त जिल्हा चिटणीसपदी आठ जणांची आणि कोषाध्यक्ष व कार्यालय मंत्री असे प्रत्येकी एक अशा एकूण २५ प्रमुख पदाधिकाऱ्यांचा समावेश आहे. तसेच कार्यकारणी सदस्य म्हणून ९२ जणांचा समावेश आहे. या व्यतिरिक्त विशेष निमंत्रित सदस्य व निमंत्रित सदस्य अशी तब्बल २०० जणांची जम्बो कार्यकारणी जाहीर केली आहे.’’
----
जिल्ह्यात एकमेव भाजप ‘बलवान’
श्री सावंत म्हणाले, ‘‘जिल्ह्यातील सर्व तालुका कार्यकारणी, १४ मंडल अध्यक्ष, ९२३ शक्ती केंद्रप्रमुख व ९२१ बूथ प्रमुख यांची यापूर्वी निवड केली आहे. आज जिल्हा कार्यकारणी जाहीर केली असून लवकरच महिला मोर्चा, किसान मोर्चा, युवा मोर्चा, अनुसूचित जाती-जमाती मोर्चा तसेच विविध ३० आघाड्यांची जिल्हा रचना जाहीर करणार आहे. जिल्ह्यात सुमारे २००० हून अधिक कार्यकर्ते भाजपच्या विविध कार्यकारणीमध्ये सहभागी असून एवढ्या मोठ्या प्रमाणात पदाधिकारी व कार्यकर्त्यांची फौज असलेला भाजप जिल्ह्यात एकमेव पक्ष आहे.’’