दाभोळे माध्यमिक विद्यालयात हिंदी दिन
साखरपा : दाभोळे माध्यमिक विद्यालयात हिंदी दिन उत्साहात साजरा करण्यात आला. या निमित्ताने विविध स्पर्धांचे आयोजन करण्यात आले होते. हिंदी विषय शिक्षक मनोहर कनावजे यांच्या संकल्पनेतून हा दिवस साजरा करण्यात आला. देशभक्तिपार गीतगायन, रांगोळी स्पर्धा झाल्या. आठवीतील विद्यार्थी प्रबुद्ध कांबळे याने गीतगायन केले तसेच शिक्षक दीपक बने यांनीही देशभक्तिपर गीत गायिले. कनावजे यांनी हिंदी भाषेचे महत्त्‍व सांगितले.

रामपूर एज्युकेशन सोसायटीची शनिवारी सभा
चिपळूण ः रामपूर एज्युकेशन सोसायटीची वार्षिक सर्वसाधारण सभा शनिवारी (ता.२०) सकाळी ११ वाजता रामपूर येथील मिलिंद हायस्कूल येथे होणार आहे. या सभेत मागील सभेचे इतिवृत्त वाचन, मंजुरी, २०२४-२५चा ताळेबंद, उत्पन्न, खर्चपत्रक आणि अहवाल सादर करणे व मंजुरी, २०२५-२६ साठी लेखा परीक्षकांची निवड व त्यांचे मानधन ठरवणे, घटनादुरुस्ती, १० वी व १२ वी यशस्वी विद्यार्थ्यांचा सत्कार करण्यात येणार आहे. सर्व सभासदांनी उपस्थित राहावे, असे आवाहन सोसायटीचे अध्यक्ष शंकर साळवी, सेक्रेटरी सदानंद तथा भाई चव्हाण, सहसेक्रेटरी सुरेश साळवी यांनी केले आहे.

‘नॅब’तर्फे मोतिबिंदू तपासणी शिबिर
चिपळूण ः येथील नॅब आय हॉस्पिटल व शृंगारतळी येथील विष्णुपंत पवार रुग्णालयातर्फे गुहागर तालुक्यातील नेत्ररुग्णांसाठी मोफत मोतिबिंदू तपासणी शिबिर घेण्यात आले. शिबिरात नेत्रचिकित्सा अधिकारी डॉ. दिनेश जोशी यांनी रुग्णांची तपासणी केली. नॅब हॉस्पिटलचे विकास अधिकारी संदीप नलावडे यांनी नियोजन केले होते. शिबिर यशस्वी होण्यासाठी विष्णुपंत पवार हॉस्पिटलचे डॉ. राजेंद्र पवार व त्यांच्या सर्व सहकाऱ्यांनी, कर्मचाऱ्यांनी विशेष सहकार्य केले.

पोफळी प्रशालेचे कुस्तीत यश
चिपळूण : रत्नागिरी येथे झालेल्या जिल्हास्तरीय शालेय कुस्ती स्पर्धेत पोफळी न्यू इंग्लिश स्कूलने उत्तुंग यश संपादन केले. या स्पर्धेमध्ये 79 किलो वजनीगटामध्ये ग्रीको रोमन प्रकारात हर्षवर्धन मदने याने प्रथम क्रमांक मिळवला. त्याची निवड विभागीय स्पर्धेसाठी झाली. शमिका पवार या खेळाडूने ५७ किलो वजनीगटामध्ये जिल्हास्तरावर द्वितीय क्रमांक मिळवला. गार्गी मोरेने ६१ किलो वजनीगटामध्ये जिल्हास्तरावर द्वितीय क्रमांक मिळवला. या सर्व खेळाडूंना प्रशालेचे क्रीडाशिक्षक, विज्ञानशिक्षक व समुपदेशक प्रदीपकुमार यादव, कुस्ती प्रशिक्षक आप्पासो मदने यांचे मार्गदर्शन लाभले.

‘रोटरी’कडून खडपोली हायस्कूलला संगणक
चिपळूण : खडपोली येथे न्यू इंग्लिश स्कूलला पुणे येथील रोटरी क्लब घोरपडी या संस्थेतर्फे तीन संगणक संच भेट देण्यात आले. कार्यक्रमाला परशुराम एज्युकेशन सोसायटीचे संचालक पराग भावे, रोटरी क्लब पुणेचे अध्यक्ष श्यामकुमार कदम, सचिव शाम वाघमारे, खजिनदार अशोक शेट्टी, मुख्याध्यापिका वीणा चव्हाण, आकाश कांबळे, सुजाता गवळी, निवेदिता साळवी, शैला शिंदे, शिक्षक-पालक संघाचे उपाध्यक्ष दिलीप चव्हाण, सदस्य अनंत गजमल उपस्थित होते.