96826

‘आम्हाला कायमस्वरूपी संधी द्या’

मुख्यमंत्री युवा कार्य प्रशिक्षणार्थी; पालकमंत्री नीतेश राणेंना साकडे

सकाळ वृत्तसेवा
सिधुदुर्गनगरी, ता. ६ ः मुख्यमंत्री युवा कार्य प्रशिक्षण योजनेंतर्गत सिंधुदुर्ग जिल्ह्यातील सर्व शासकीय आस्थापनेवर रुजू असलेल्या सुमारे १ हजार १११ प्रशिक्षणार्थ्यांना कायमस्वरूपी रोजगार मिळावा, या दृष्टीने शासनाने नवीन शासन निर्देश द्यावेत, अशी मागणी या प्रशिक्षणार्थी उमेदवारांनी पालकमंत्री नीतेश राणे यांच्याकडे केली. शासन याबाबत सकारात्मक निर्णय घेण्याच्या विचाराधीन आहे. लवकरच याबाबत निर्णय घेतला जाईल, अशी ग्वाही पालकमंत्री राणे यांनी दिली.
महाराष्ट्र शासन कौशल्य रोजगार उद्योजकता व नाविन्यता विभागमार्फत शासनाने जिल्ह्यातील पदवीधर आणि विविध कौशल्य विकास प्रशिक्षण घेतलेल्या व डीएड बेरोजगार उमेदवारांना सहा महिन्यांसाठी नियुक्त्या दिल्या व त्यानंतर पुढील पाच महिने नियुक्ती वाढवून दिली. सध्या अनेक उमेदवार नियुक्ती कालावधी संपल्याने घरी बसून आहेत. या उमेदवारांना शासनाने नव्याने नियुक्ती आदेश द्यावेत आणि विविध विभागांमध्ये भरती करून घ्यावे, या मागणीसाठी प्रशिक्षणार्थिनी पालकमंत्री राणे यांची भेट घेऊन निवेदन दिले. यावेळी युवा कौशल्य विकास प्रशिक्षणार्थी मोठ्या संखेने उपस्थित होते.
---
...तर पुन्हा बेरोजगार होण्याची भीती
निवेदनात म्हटले आहे की, ‘मुख्यमंत्री युवा कार्य प्रशिक्षण योजना राज्य पातळीवर मोठ्या प्रमाणात सुरू केली आहे. या उपक्रमामुळे जिल्ह्यातील स्थानिक बेरोजगार तरुणांना रोजगाराची संधी मिळाली आहे. योजनेअंतर्गत प्रशिक्षणार्थी म्हणून सिंधुदुर्ग विभागातील शासकीय कार्यालयातील आस्थापनेवर प्रशिक्षणार्थी म्हणून निवड केली आहे. आता ११ महिन्यांचा कार्यकाळ संपला आहे. आम्ही ग्रामीण व शहरी भागातील प्रशिक्षणार्थी म्हणून काम करत असताना त्या आस्थापनामधील कामाचा अनुभव जिद्दीने पूर्ण करण्याचा प्रयन करत आहोत. मात्र, आम्ही पुन्हा बेरोजगार होणार आहोत. आम्हाला पुनश्च रोजगाराची संधी मिळावी.’