शाळेतील कॅमेरा, भांडी पळवली
तुळसुंदे-मावळतीवाडीतील प्रकार ; संशयित सीसीटीव्हीत कैद
सकाळ वृत्तसेवा
राजापूर, ता. ९ ः तालुक्यातील तुळसुंदे, मावळतीवाडी येथील जिल्हा परिषद शाळेतील सीसीटीव्ही कॅमेऱ्‍यासह शाळेच्या स्वयंपाक घरातील भांडी चोरून नेल्याचा प्रकार समोर आला आहे. या प्रकरणी मयुरेश महादेव लाकडे (वय ३२, रा. तुळसुंदे, उगवतीवाडी) या संशयिताविरोधात नाटे पोलिस ठाण्यात गुन्हा दाखल करण्यात आला आहे.
या प्रकरणी पोलिसांनी दिलेल्या माहितीनुसार, जिल्हा परिषद शाळा तुळसुंदे, मावळतीवाडी या शाळेत कार्यरत असणारे शिक्षक युवराज बबनराव देशमुख हे ७ ऑक्टोबरला सायंकाळी शाळा सुटल्यानंतर शाळेच्या वर्गखोल्या कुलूपबंद करून गेले होते. ८ ऑक्टोबरला सकाळी ते शाळेत आले असता शाळेच्या पॅसेजमध्ये व बाहेरील बाजूस असलेले सीसीटीव्ही कॅमेरे दिसून आले नाहीत. तसेच, बंदिस्त किचनशेडचा कडीकोयंडा उचकटून आतील साहित्य चोरून नेल्याचे त्यांच्या निदर्शनास आले.
त्यांनी घडला प्रकार सीसीटीव्ही डीव्हीआरमध्ये पाहिला असता तुळसुंदे गावातील संशयित मयुरेश महादेव लाकडे याने शाळेच्या इमारतीत प्रवेश करून शाळेच्या आवारातील किचनरूमचा कडीकोयंडा उचकटून आत प्रवेश केल्याचे निदर्शनास आले. या प्रकरणी देशमुख यांनी नाटे पोलिस ठाण्यात फिर्याद दिली. त्यानुसार संशयित मयुरेश लाकडे याच्याविरोधात गुन्हा दाखल करण्यात आला आहे.