अन्यायग्रस्त कामगारांचा
प्रश्न मुख्यमंत्र्यांपुढे मांडणार
चिपळूण, ता. १३ ः गाणे खडपोली येथील एका कंपनीतील कामगारांवर कंपनी व्यवस्थापनाकडून अन्यायकारक कारवाई करण्यात आली आहे. याबाबत मुख्यमंत्री देवेंद्र फडणवीस आणि भाजप प्रदेशाध्यक्ष रवींद्र चव्हाण यांची भेट घेणार असल्याची माहिती भाजप नेते प्रशांत यादव यांनी दिली. कंपनीकडून होणाऱ्या अन्यायाविरोधात कामगारांनी १४ ऑक्टोबर रोजी बेमुदत उपोषणाचा इशारा दिला आहे. या उपोषणाला पाठिंबा असल्याचे त्यांनी सांगितले.
प्रशांत यादव म्हणाले, सुमारे २४० कामगारांवर आणि त्यांच्या कुटुंबीयांवर उपासमारीची वेळ आली आहे. या कामगारांनी १४ ऑक्टोबरपासून बेमुदत उपोषणाचा इशारा दिला आहे. हे कामगार खडपोली, गाणे, वालोटी, कळकवणे आणि लगतच्या परिसरातील आहेत. आपल्याच परिसरातील स्थानिकांवर ऐन सणासुदीच्या तोंडावर कंपनीकडून अन्याय होत असेल, तर तो सहन केला जाणार नाही. यासंदर्भात मुख्यमंत्री फडणवीस यांची भेट घेणार असल्याचे यादव यांनी सांगितले.