सावंतवाडीत २१ मतदान केंद्रे प्रस्तावित
पालिका निवडणूक ः प्रशासनाकडून युद्धपातळीवर तयारी सुरू
सकाळ वृत्तसेवा
​सावंतवाडी, ता. १३ ः सावंतवाडी नगरपरिषदेच्या आगामी सार्वत्रिक निवडणुकीसाठी निवडणूक आयोगाने तयारी सुरू केली असून, १० प्रभागांमध्ये (वॉर्ड) एकूण २१ मतदान केंद्रे प्रस्तावित करण्यात आली आहेत. या मतदान केंद्रांची यादी नगरपरिषदेने जाहीर केली आहे.
​​प्रभाग क्रमांक १ मध्ये वि. स. खांडेकर विद्यालयातील दोन वर्ग (आठवी व दहावी), तर प्रभाग क्रमांक २ मध्ये (कै.) श्रीमती लक्ष्मीबाई मुरारी माधव विद्यालय (जिल्हा परिषद शाळा क्र. ६), बाळासाहेब ठाकरे ज्ञान प्रबोधिनी आणि जिमखाना समाजमंदिर बालावाडी इमारत या ठिकाणी प्रत्येकी एक केंद्र प्रस्तावित आहे. ​प्रभाग क्रमांक ३ मध्ये काझी शाहबुद्दीन हॉलचे पूर्व आणि पश्चिम असे दोन भाग मतदान केंद्र म्हणून निश्चित करण्यात आले आहेत. प्रभाग क्रमांक ४ मध्ये जिल्हा परिषद प्राथमिक शाळा क्र. ७ (तिसरीचा वर्ग) आणि सेंट्रल इंग्लिश स्कूल (नर्सरी वर्ग) येथे मतदान होणार आहे.
​प्रभाग क्रमांक ५ मध्ये रघुनाथ मार्केट इमारत आणि शांतिनिकेतन इंग्लिश मीडियम स्कूल (ज्युनिअर केजी वर्ग) येथे दोन केंद्रे असणार आहेत. प्रभाग क्रमांक ६ साठी कळसुलकर इंग्लिश स्कूलच्या तळमजला हॉलचा पूर्व आणि पश्चिम भाग वापरला जाईल.
​प्रभाग क्रमांक ७ मध्ये जिल्हा परिषद पूर्ण प्राथमिक शाळा क्र. ४ (पाचवी वर्ग) आणि भाईसाहेब सावंत आयुर्वेद महाविद्यालयाचा स्वस्थवृत्त विभाग ही दोन केंद्रे आहेत. प्रभाग क्रमांक ८ मध्ये मिलाग्रीस हायस्कूलचे दोन वर्ग (नववी ''अ'' आणि ''ब'') मतदान केंद्रासाठी निवडले आहेत.
​प्रभाग ९ साठी बी. एस. बांदेकर फाईन आर्ट कॉलेज इमारतीमधील सेमिनार हॉलचा पूर्व व पश्चिम भाग, तर प्रभाग क्रमांक १० साठी टोपीवाला स्मारक तंत्रशाळेतील तंत्र माध्यमिक शाळा व कनिष्ठ महाविद्यालयातील दोन वर्गखोल्या मतदान केंद्रे म्हणून प्रस्तावित करण्यात आल्या आहेत.
​या २१ मतदान केंद्रांवर एकूण अंदाजे १९,६९५ मतदारांची नोंदणी आहे. प्रभाग ४ मधील ४/१ केंद्रामध्ये (जिल्हा परिषद प्राथमिक शाळा क्र. ७) सर्वाधिक ११२९ मतदार असून, प्रभाग ९ मधील ९/१ केंद्रामध्ये (बी. एस. बांदेकर फाईन आर्ट कॉलेज) सर्वात कमी ७०९ मतदार आहेत. ​नगरपरिषद प्रशासनाने निवडणुकीच्या दृष्टीने आवश्यक ती तयारी सुरू केली असून, लवकरच निवडणूक कार्यक्रमाची घोषणा होण्याची शक्यता आहे.