‘दिव्यांगांच्या योजनांचे प्रस्ताव
गटविकास अधिकाऱ्यांकडे द्या’
सकाळ वृत्तसेवा
रत्नागिरी, ता. १७ ः जिल्हा परिषदेने स्वउत्पन्नातून दिव्यांगांच्या कल्याणकारी योजनांसाठी राखून ठेवलेल्या पाच टक्के निधीतून वैयक्तिक व सामूहिक लाभाच्या योजनांसाठी लाभार्थ्यांकडून अर्ज मागवण्यात येत आहेत. लाभ घेऊ इच्छिणाऱ्या दिव्यांग लाभार्थ्यांनी किंवा त्यांच्या पालकांनी, समुपदेशन तसेच सल्लामसलत करणाऱ्या केंद्रांनी कार्यालयाकडून अर्ज प्राप्त करून घेऊन आवश्यक त्या कागदपत्रासह परिपूर्ण प्रस्ताव गटविकास अधिकारी कार्यालयाकडे सादर करावेत, असे आवाहन जिल्हा दिव्यांग सक्षमीकरण अधिकारी यांनी केले आहे. दिव्यांग व्यक्तींना साहाय्यभूत साधने व तंत्रज्ञानाकरिता अर्थसहाय्यक देणे, स्वयंरोजगारासाठी अर्थसाहाय्य देणे, विवाहासाठी प्रोत्साहनपर अनुदान देणे, दिव्यांग विद्यार्थी व दिव्यांग खेळाडू यांना अर्थसाहाय्य देणे या योजनांसाठी अर्ज मागवण्यात येत आहेत. योजनांसाठी विहित नमुन्यातील अर्ज गटविकास अधिकारी, पंचायत समिती कार्यालय (सर्व) तसेच जिल्हा दिव्यांग सक्षमीकरण अधिकारी, जिल्हा परिषद यांच्या कार्यालयात उपलब्ध आहेत.
---