खेडमध्ये रस्ते डांबराविना
मंगेश मोरे ः जनतेच्या पैशांची उधळपट्टी
सकाळ वृत्तसेवा
खेड, ता. २५ : शहरातील विविध भागात सुरू असलेल्या रस्तेदुरुस्ती आणि बांधकामाची कामे निकृष्ट दर्जाची आहेत, असा आक्षेप सामाजिक कार्यकर्ते मंगेश मोरे यांनी केला आहे. खेड शहरातील अनेक ठिकाणी रस्त्याच्या कामात डांबराचा वापर न करता केवळ खडी टाकून रस्ते तयार केले आहेत, असे त्यांनी सांगितले. मोरे यांनी प्रत्यक्ष घटनास्थळी भेट देऊन काही रस्त्यांची पाहणी केली. रस्ते केले जात आहेत ही चांगली गोष्ट आहे; पण दर्जा डावलून केली जात असलेली ही कामे म्हणजे जनतेच्या पैशांची सरळ लूट आहे, असे मत त्यांनी व्यक्त केले. निवडणुकीच्या पार्श्वभूमीवर ही कामे केवळ दाखवण्यासाठीच गतीने केली जात असल्याचा संशय त्यांनी व्यक्त केला. शहरातील अनेक रस्ते गेल्या काही महिन्यांपासून खराब अवस्थेत होते. नागरिकांच्या तक्रारी वाढत असताना अचानक कामांना वेग देण्यात आल्याने अनेक प्रश्न निर्माण होत आहेत; मात्र जलदगतीच्या या कामांत गुणवत्ता पूर्णतः बाळगली नसल्याचे उघड झाल्याचा दावा मोरे यांनी केला. या संदर्भात नगर परिषद प्रशासनाने तातडीने तपास करून निकृष्ट दर्जाच्या कामांवर कठोर कारवाई करावी, अशी मागणी नागरिकांकडून होत आहे.