08621

क्रीडा क्षेत्रात करिअरच्या संधी

शैलेश नाईक ः बांदा व्ही. एन. नाबर शाळेत क्रीडा महोत्सव

सकाळ वृत्तसेवा
बांदा, ता. ५ ः आजच्या युगात विद्यार्थ्यांनी खेळाकडे करिअर म्हणून बघितले पाहिजे. खेळातून नोकरीच्या अनेक संधी उपलब्ध आहेत, असे मत दोडामार्ग इंग्लिश स्कूलचे माजी मुख्याध्यापक शैलेश नाईक यांनी व्यक्त केले. ते येथील व्ही‌. एन. नाबर मेमोरियल इंग्लिश मीडियम स्कूलच्या आंतरशालेय क्रीडा स्पर्धेच्या उद्‍घाटन कार्यक्रमात ते बोलत होते.
खेळामुळे मुलांचे आरोग्य चांगले व तंदुरुस्त राहते. त्यांची अभ्यास करण्याची क्षमता सुद्धा वाढते. वेगवेगळ्या प्रकारच्या क्रीडा स्पर्धेत भाग घेतल्याने दहावी परीक्षेत विद्यार्थ्यांना विशेष गुण मिळतात. खेळामुळे अनेक क्षेत्र निवडता येतात. समालोचक, फिजिओथेरपिस्ट, बातमी क्षेत्र अशा अनेक प्रकारच्या संधी उपलब्ध होतात. म्हणूनच खेळाबाबत सकारात्मक दृष्टिकोन ठेवा, असे मत श्री. नाईक यांनी स्पष्ट केले.
यावेळी जिल्हा परिषद माजी शिक्षणाधिकारी रत्नाकर धाकोकरकर यांनी विद्यार्थ्यांना खेळासंदर्भात मार्गदर्शन केले. व्यासपीठावर प्रशाळेच्या मुख्याध्यापिका मनाली देसाई, उपमुख्यापिका शिल्पा कोरगावकर, स्कूल कमिटी अध्यक्ष राजेश गोवेकर, माजी मुख्याध्यापक तथा स्कूल कमिटी सदस्य भिकाजी धुरी आदी उपस्थित होते.
मान्यवरांच्या उपस्थितीत ज्योत प्रज्वलित करून व दीपप्रज्वलनाने क्रीडा स्पर्धेचे उद्‍घाटन करण्यात आले. शाळेतील नर्सरी ते दहावीपर्यंतच्या मुलांनी विविध क्रीडा प्रकारात भाग घेतला. स्पर्धा यशस्वी करण्यासाठी शाळेतील शिक्षक, शिक्षकेतर कर्मचारी, एम.एस.ए.टी. विभाग शिक्षक यांनी विशेष परिश्रम घेतले. विजेत्या विद्यार्थ्यांचे संस्थेच्या व शाळेच्या वतीने अभिनंदन करण्यात आले. स्नेहा नाईक यांनी कार्यक्रमाचे सूत्रसंचालन केले.