गुणवंत खेळाडूंना संधी द्या
बळीराम राठोड ः हिवाळी क्रीडा स्पर्धेस सुरुवात
सकाळ वृत्तसेवा
गावतळे, ता. १२ ः गुणवान खेळाडूंना संधी मिळवून द्या, ग्रामीण भागातील विद्यार्थ्यांच्या क्रीडाकौशल्याला व्यासपीठ मिळावे यासाठी दरवर्षी आयोजित केल्या जाणाऱ्या या स्पर्धांना यंदाही उत्तम प्रतिसाद मिळाला आहे, असे प्रतिपादन शिक्षणविस्तार अधिकारी बळीराम राठोड यांनी केले.
दापोली तालुक्यातील जिल्हा परिषद पुरस्कृत कोळबांद्रे केंद्रांतर्गत हिवाळी क्रीडा स्पर्धेच्या उद्‍घाटनप्रसंगी ते बोलत होते. या वेळी सरपंच वसंत मेंगे, पोलीस पाटील रोशन पादड, तंटामुक्त समिती अध्यक्ष जयेंद्र कावणकर, सुरेश मेंगे उपस्थित होते. दिवसभर विविध गटांमध्ये धावणे, लांब उडी, गोळाफेक, खो-खो, कबड्डी आदी स्पर्धा रंगल्या. केंद्रातील सर्व शाळांनी सहभाग नोंदवून क्रीडांगणावर चुरस निर्माण केली. त्यात जि. प. शाळा साखळोली क्र.१ येथील विद्यार्थ्यांनी उल्लेखनीय कामगिरी करत ३६ पैकी १७ बक्षिसे पटकावली आणि जनरल चॅम्पियनशीप आपल्या नावे केली.