बांद्यात गुटखा पकडला

दोघे ताब्यात; मोटारीतून सुरू होती वाहतूक

सकाळ वृत्तसेवा
बांदा, ता. १९ ः मुंबई गोवा महामार्गावरील बांदा बसस्थानक व पोलिस चेकपोस्टच्या मध्यवर्ती भागात सिंधुदुर्ग पोलिसांच्या विशेष पथकाने अवैध गुटखा वाहतुकीवर कारवाई केली. या कारवाईत ३३ हजार ९०० रुपयांच्या गुटख्यासह २ लाखांचा मुद्देमाल जप्त करण्यात आला. याप्रकरणी दिनेश अर्जुन गावडे (वय ४०, रा. चौके ता. मालवण) व आबा शिरसाट (रा. बांदा) या दोघांवर कारवाई करण्यात आली.
याबाबतची फिर्याद बांदा पोलिस स्टेशनमध्ये दाखल झाली आहे. या कारवाईनंतर ज्या ठिकाणाहून गुटखा आणण्यात आला, त्या गोवा येथील ठिकाणी जात बांदा पोलिसांनी गोवा पोलिसांच्या निदर्शनास तेथील साठा आणून दिला. गोव्यामधील पुढील कारवाई गोवा पोलिस करीत आहेत. ही कारवाई गुरुवारी (ता. १८) रात्री उशिरा करण्यात आली.
याबाबत अधिक माहिती अशी की, गोव्यातून सिंधुदुर्गात गुटखा वाहतूक होणार असल्याची माहिती विशेष पथकाला मिळाली होती. त्यानुसार बांदा बसस्थानक व चेकपोस्टच्या मध्यवर्ती भागात पोलिसांनी सापळा रचला होता. बांद्याहून येणारी मोटार (एमएच ०७, क्यू ७१७३) तपासणीसाठी थांबविण्यात आली. यावेळी त्यामध्ये विविध ब्रँडचा तंबाखूचा अवैध साठा आढळून आला. बाजारभावाप्रमाणे याची किंमत ३३ हजार ९०० रुपये आहे. तसेच बेकायदा गुटखा वाहतूक प्रकरणी वापरण्यात आलेली सुमारे २ लाख रुपयांची कार जप्त करण्यात आली. संशयितांवर विविध कलमांनुसार गुन्हा दाखल करण्यात आला. ही कारवाई विशेष पथकाचे पीएसआय आर. बी. शेळके, एएसआय डी. डी. माने, महिला पोलिस हवालदार डी. व्ही. पालकर, पोलिस नाईक रोहन सावंत यांच्या पथकाने केली.
-------------
चौकट
तोर्से-गोवा येथे साठवणूक केंद्र
दरम्यान, विशेष पथकाला गुटखा साठवणूक केंद्र तोर्से (गोवा) येथे असल्याची माहिती प्राप्त झाली. त्यानुसार बांदा पोलिसांना सूचना देण्यात आल्या. पोलिस उपनिरीक्षक युवराज झांजुर्णे यांच्या मार्गदर्शनाखाली व मोपा पोलिसांच्या सहकार्याने या केंद्रावर धाड टाकण्यात आली. तेथील मुद्देमाल मोपा पोलिसांच्या स्वाधीन करण्यात आला.