सत्यवान दळवींचे राज्यस्तरीय यश
मुख्याध्यापक महामंडळ निबंध स्पर्धा ; तृतीय क्रमांक
सकाळ वृत्तसेवा
गावतळे, ता. २४ ः महाराष्ट्र राज्य मुख्याध्यापक महामंडळाच्यावतीने आयोजित राज्यस्तरीय शिक्षक निबंध स्पर्धेत दापोली तालुक्यातील आगरवायंगणीचे मुख्याध्यापक सत्यवान दळवी यांनी पदव्युत्तर पदवीधर शिक्षक या गटातून तृतीय क्रमांक प्राप्त केला आहे.
महाराष्ट्र राज्य मुख्याध्यापक महामंडळाच्यावतीने आयोजित निबंध स्पर्धेत दळवी यांचा दापोली तालुकास्तरावर प्रथम, बहुजन हिताय विद्यामंदिर आगरवायंगणी विद्यालयातील शिक्षिका जयश्री रिंगणे यांचा द्वितीय तर शिक्षक शैलेश वैद्य यांचा तृतीय क्रमांक, जिल्हास्तरावर निबंध स्पर्धेत मुख्याध्यापक दळवी यांचा प्रथम आणि राज्यस्तरीय निबंध स्पर्धेत तृतीय क्रमांक प्राप्त झाला. दळवी यांनी १३वे राज्यस्तरीय पत्रकार संमेलन यामध्ये ही निबंध स्पर्धेत यश संपादन केले होते. ते मुख्याध्यापक, पत्रकार, क्रीडाशिक्षक, तालुका समन्वयक, रत्नागिरी जिल्हा कुस्ती असोसिएशन कार्यकारिणी सदस्य, दापोली अध्यापक संघाचे कार्याध्यक्ष, दापोली तालुका मराठी पत्रकार संघ खजिनदार, श्रीजी गुलमोहर सोसायटी डी-२ खजिनदार अशा विविध पदांवर कार्यरत आहेत.
दापोली तालुका माध्यमिक अध्यापक संघाच्यावतीने अभिनंदन करताना सचिव चंद्रकांत मोरे यांनी सदिच्छा दिल्या. ते म्हणाले, आपल्या सखोल अभ्यासपूर्ण लेखनातून, शैक्षणिक दृष्टिकोनातून मांडलेले विचार, समाजाभिमुख दृष्टी आणि शिक्षक म्हणून असलेली बांधिलकी यांची राज्यपातळीवर दखल घेतली जाणे, ही संपूर्ण शिक्षकवर्गासाठी अभिमानाची बाब आहे. मुख्याध्यापक म्हणून शाळेच्या गुणवत्तावृद्धीसाठी तसेच शिक्षक व विद्यार्थ्यांच्या सर्वांगीण विकासासाठी केलेले कार्य निश्चितच प्रेरणादायी आहे.