24748

‘मदर क्विन्स’ स्कूलमध्ये
विद्यार्थ्यांना आरोग्याचे धडे

सकाळ वृत्तसेवा
सावंतवाडी, ता. १५ ः सिंधुदुर्ग जिल्हा शिक्षण प्रसारक मंडळ संचलित येथील मदर क्विन्स इंग्लिश स्कूलमध्ये सहावी ते आठवीच्या मुलांसाठी मानसिक, भावनिक व शारीरिक स्वास्थ्यविषयक मार्गदर्शनपर सत्राचे आयोजन करण्यात आले होते. या सत्रात प्रमुख मार्गदर्शक डॉ. राजशेखर कार्लेकर यांनी कुमारवयीन मुलांच्या सर्वांगीण विकासावर सखोल मार्गदर्शन केले. ​
डॉ. कार्लेकर यांनी प्रामुख्याने कुमारवयातील मुलांमध्ये होणारे शारीरिक व मानसिक बदल आणि त्याकडे पाहण्याचा सकारात्मक दृष्टिकोन यावर प्रकाश टाकला. सध्याच्या काळात सोशल मीडियाच्या अतिवापरामुळे मुलांच्या आरोग्यावर आणि मानसिकतेवर होणारे दुष्परिणाम त्यांनी उदाहरणांसह पटवून दिले. ​या उपक्रमाबद्दल सिंधुदुर्ग जिल्हा शिक्षण प्रसारक मंडळाचे अध्यक्ष खेमसावंत भोसले, चेअरमन शुभदादेवी भोसले, कार्यकारी विश्वस्त लखमराजे भोसले, श्रद्धाराजे भोसले, मंडळाचे संचालक दिलीप देसाई यांनी कौतुक केले. मंडळाचे सहाय्यक संचालक ॲड. शामराव सावंत, सदस्य जयप्रकाश सावंत, डॉ. सतीश सावंत, मुख्याध्यापिका अनुजा साळगावकर, प्रशालेचे शिक्षक, शिक्षकेतर कर्मचारी, पालक-शिक्षक संघ कार्यकारी समितीचे सदस्य यांनी या कार्यक्रमाला शुभेच्छा दिल्या.