देवगडातील चार वर्षीय मुलीवर
यशस्वी ह्रदयरोग शस्त्रक्रिया

सकाळ वृत्तसेवा
देवगड, ता. २० : तालुक्यातील एका चार वर्षीय मुलीवर जन्मजात हृदयरोगासाठी शासनाच्या राष्ट्रीय बाल स्वास्थ्य कार्यक्रम अंतर्गत यशस्वी शस्त्रक्रिया करण्यात आली. ती आता पूर्णपणे ठणठणीत असल्याचा दावा आरोग्य विभागाकडून करण्यात आला आहे.
याबाबत देण्यात आलेल्या माहितीनुसार, राष्ट्रीय बाल स्वास्थ्य कार्यक्रम अंतर्गत ० ते १८ वर्षे वयोगटातील मुलांची नियमित आरोग्य तपासणी केली जाते. एका अंगणवाडीतील आरोग्य तपासणी दरम्यान वैद्यकीय अधिकारी डॉ. रुपाली पोकळे आणि डॉ. अमित कोळी यांनी संबंधित मुलीच्या आजाराचे प्राथमिक निदान केले. पुढे जिल्हा शल्यचिकित्सक डॉ. श्रीपाद पाटील यांच्या मार्गदर्शनाखाली आयोजित हृदयविकार तपासणी शिबिरात तिच्या जन्मजात हृदयविकाराचे निश्चित निदान करण्यात आले. शस्त्रक्रिया धोकादायक असल्याच्या भीतीने तिचे आई-वडील व आजी-आजोबा सुरुवातीला तयार नव्हते; मात्र डॉ. पोकळे यांच्यासह पथकाने सुमारे वर्षभर सातत्याने समुपदेशन करून कुटुंबीयांना आजाराची गंभीरता व उपचाराचे महत्त्व पटवून दिल्यानंतर कुटुंबियांनी शस्त्रक्रियेस संमती दर्शवली. मुंबईतील एका रुग्णालयात मोफत यशस्वी शस्त्रक्रिया करण्यात आली. शस्त्रक्रियेनंतर मुलीच्या प्रकृतीत लक्षणीय सुधारणा होऊ लागली असून ती आता निरोगी आणि सक्रिय आहे. तिचे वजनही वाढून वयानुसार सामान्य झाल्याचा दावा आरोग्य विभागाकडून करण्यात आला आहे. या यशस्वी उपचाराबद्दल कुटुंबीयांनी पथकाचे तसेच ग्रामीण रुग्णालयाचे वैद्यकीय अधीक्षक डॉ. प्रकाश पाटोदेकर यांचे आभार मानले. या घटनेमुळे लवकर निदान, सातत्यपूर्ण समुपदेशन आणि वेळेवर उपचार यांचे महत्त्व अधोरेखित झाले आहे.