रत्नागिरीचा उद्या पाणीपुरवठा बंद
सकाळ वृत्तसेवा
रत्नागिरी, ता. २१ : शहरातील नागरिकांना नगरपालिकेच्या पाणीपुरवठा विभागामार्फत आवाहन केले आहे. हाती घेण्यात आलेल्या देखभाल आणि दुरुस्तीच्या कामामुळे सोमवारी (ता. २३) संपूर्ण शहराचा पाणीपुरवठा बंद राहणार आहे. नगरपालिकेने आज या संदर्भात अधिकृत सूचना जारी केली आहे.
रत्नागिरी नगरपरिषदेच्या पाणीपुरवठा योजनेच्या प्रतिबंधात्मक देखभाल आणि दुरुस्तीचे काम तातडीने करणे आवश्यक आहे. भविष्यात ऐन उन्हाळ्यात तांत्रिक बिघाड होऊन पाणीटंचाई भासू नये यासाठी ही ‘प्रिव्हेंटिव्ह मेंटेनन्स’ मोहीम राबवली जात आहे. या कामासाठी जलवाहिन्या आणि पंपिंग स्टेशनवरील यंत्रणेची तपासणी केली जाणार आहे. सोमवारी दिवसभर पाणीपुरवठा बंद राहणार असल्याने मंगळवारी सकाळीदेखील पाण्याचा दाब कमी राहण्याची शक्यता नाकारता येत नाही. त्यामुळे प्रशासनाने नागरिकांना आवाहन केले आहे की, पाणी काटकसरीने आणि जपून वापरा आणि देखभाल दुरुस्तीच्या कामात पालिका प्रशासनास सहकार्य करा.
---