साहित्यिकांचे देवरुखात उद्या संमेलन
सकाळ वृत्तसेवा
साडवली, ता, २६ ः देवरूख येथील श्री सद्गुरू लोकमान्य वाचनालयात संगमेश्वर तालुक्यातील साहित्यिकांचे एकदिवसीय संमेलन शनिवारी (ता. २८) होणार आहे. रत्नागिरी जिल्हा ग्रंथालयाच्या सुवर्णमहोत्सवी वर्षानिमित्त हे संमेलन आयोजित करण्यात आले आहे.
साहित्य संमेलनाच्या अध्यक्षपदी आठल्ये-सप्रे-पित्रे महाविद्यालयाच्या मराठी विभाग प्रमुख प्रा. डॉ. वर्षा फाटक असणार आहेत. महाराष्ट्र ग्रंथालय चळवळीचे मार्गदर्शक श्रीकृष्ण साबणे यांच्या हस्ते संमेलनाचे उद्‍घाटन होईल. साहित्यिका प्रा. जयश्री बर्वे, गोवा येथील साहित्यिक आणि व्याख्याते कृष्णाजी कुलकर्णी, तसेच ज्येष्ठ समीक्षक सुरेश जोशी हे प्रमुख पाहुणे म्हणून संमेलनाला उपस्थित राहणार आहेत.
दीपक लिंगायत- एकांकिका, स्वानंदी जोगळेकर- ललित लेख, अमित पंडित- विज्ञान कथा, डॉ. निधी पटवर्धन- विनोदी कथा, मंजुश्री भागवत- प्रवासवर्णन, अनघा लिमये- पुस्तक परीक्षण, प्रा. सीमा शेट्ये- वैचारिक निबंध, स्वानंद जोशी- कथा आणि आनंद बोंद्रे- संगमेश्वरी बोलीवरील साहित्य वाचन करणार आहेत. भारती राजवाडे, विनय होडे आणि मदन मोडक हे काव्यवाचन करणार आहेत. संमेलनात लेखक आणि शिक्षक अमित पंडित यांच्या व्हाईट बोर्ड पुस्तकाचे प्रकाशन होणार आहे. साहित्य संमेलनाला साहित्यप्रेमी, शिक्षकांनी उपस्थित राहावे, असे आवाहन वाचनालयाचे अध्यक्ष ग. के. जोशी आणि संमेलनाचे समन्वयक प्रा.डॉ. अ. म. कुलकर्णी यांनी केले आहे.