प्रतिबंधित गुटखाजन्य साठा जप्त
धाऊलवल्लीजवळ कारवाई ; ७ लाख ९३ हजाराचा माल
सकाळ वृत्तसेवा
रत्नागिरी, ता. २७ ः राज्य शासनाच्या जनहित व जन आरोग्याच्या दृष्टीने प्रतिबंध केलेल्या तंबाखूजन्य पान मसाल्याचे (गुटखाजन्य) साहित्य बाळगल्याप्रकरणी संशयितावर नाटे सागरी पोलिस ठाण्यात गुन्हा दाखल करण्यात आला आहे. संशयिताकडून ७ लाख ९३ हजार ५६० रुपयांचा मुद्देमाल जप्त करण्यात आला आहे. मारुती बापू कोकणे (वय ३७, मुळ रा. म्हैशाळ, मिरज, जि. सांगली, सध्या रा. फणसोप, रत्नागिरी) असे संशयिताचे नाव आहे. ही घटना गुरुवारी (ता.२६) सायंकाळी राजापूर तालुक्यातील धाऊलवल्ली फाट्याजवळ घडली.
पोलिसांनी दिलेल्या माहितीनुसार संशयिताकडे धाऊलवल्ली फाट्याजवळ महाराष्ट्र राज्य शासनाने जनहित व जन आरोग्याच्या दृष्टीकोनातून प्रतिबंधित केलेला ७ लाख ९३ हजार ५६० रुपयांचा तंबाखूजन्य पानमसल्याचे साहित्य आणि ७ लाख ५० हजाराची मोटारीचा समावेश आहे. या प्रकरणी पोलिस हेड कॉन्स्टेबल दत्तात्रय पाटील यांनी नाटे पोलिस ठाण्यात तक्रार दिली. तक्रारीवरुन पोलिसांनी संशयिताविरुद्ध गुन्हा दाखल केला आहे. अधिक तपास नाटे पोलिस अमंलदार करत आहेत.