28385

दुचाकीला धडक देऊन
मोटारीसह चालक पसार

माजगावातील घटनेत दोघे जखमी

सकाळ वृत्तसेवा
सावंतवाडी, ता. ३ ः माजगाव येथील धोकादायक वळणावर भरधाव मोटारीने दुचाकीला धडक दिल्याने दोन तरुण जखमी झाले. संतोष नारायण सावंत (रा. कोलगाव) आणि जोसेफ डिसोजा (रा. जुना बाजार, सावंतवाडी) अशी जखमींची नावे आहेत. अपघातानंतर वाहनचालक घटनास्थळावरून पसार झाला असून पोलिसांकडून त्याचा शोध सुरू आहे.
पोलिसांनी दिलेल्या माहितीनुसार, संतोष सावंत व जोसेफ डिसोजा हे दोघेही मोपा विमानतळावर कामाला आहेत. सोमवारी रात्री उशिरा ते दुचाकीने सावंतवाडीच्या दिशेने येत होते. माजगाव येथे मागून भरधाव येणाऱ्या अनोळखी मोटारीने त्यांच्या दुचाकीला जोरदार धडक दिली. यात संतोष याच्या डोक्याला व शरीराला गंभीर दुखापत झाली. त्याला अधिक उपचारासाठी गोवा मेडिकल कॉलेज (गोमेकॉ) येथील रुग्णालयात दाखल केले, तर जोसेफ याच्यावर स्थानिक रुग्णालयात उपचार सुरू असून त्यांची प्रकृती स्थिर असल्याची माहिती मिळाली. अपघातात दुचाकीचेही मोठे नुकसान झाले. पोलिसांनी तातडीने घटनास्थळी धाव घेत पंचनामा केला. पोलिस अधिकारी मनोज राऊत व श्री. लोकरे या प्रकरणाचा अधिक तपास करत आहेत.