वारंगाची तुळसुली'' गोशाळेत
प्राथमिक शिक्षक संघाचा उपक्रम
कुडाळ , ता. १२:अखिल महाराष्ट्र प्राथमिक शिक्षक संघाच्या नेत्या सुलभाताई दोंदे यांच्या जयंतीचे आणि महिला दिनाचे औचित्य साधून, अखिल महाराष्ट्र प्राथमिक शिक्षक संघ (महिला सेल, कुडाळ) यांच्या वतीने एक विशेष कार्यक्रम आयोजित केला होता. महिला सेलच्या अध्यक्षा स्नेहा सावंत व सचिव ऋतुजा गावडे यांच्या संकल्पनेतून श्रीकृष्ण आनंदवन गोशाळा, वारंगाची तुळसुली येथे हा उपक्रम पार पडला.
पारंपारिक कार्यक्रमांना फाटा देऊन निसर्गाच्या सानिध्यात गो-सेवेच्या माध्यमातून महिला दिन साजरा केल्याबद्दल या उपक्रमाचे सर्वत्र कौतुक होत आहे. यावेळी उपस्थित महिला शिक्षिकांनी गोशाळेतील गायींना चारा भरवला आणि मनोभावे गो-पूजन केले. या प्रसंगी महिलांनी देशी गायींचे महत्त्व आणि गो-पालनाविषयी सविस्तर माहिती जाणून घेतली.
केवळ उत्सव साजरा न करता सामाजिक बांधिलकी जपण्याच्या उद्देशाने, महिला सेलच्या वतीने गोशाळेला मदतीचा धनादेश सुपूर्द करण्यात आला. या कार्यक्रमाला अखिल महाराष्ट्र प्राथमिक शिक्षक संघाच्या राष्ट्रीय सचिव व राज्य कोषाध्यक्ष विनयश्री पेडणेकर, राज्य संघाचे पदाधिकारी राजा कविटकर, जिल्हा पदाधिकारी तसेच कुडाळ तालुका अध्यक्ष यल्लाप्पा दळवी, सचिव विजय धामापूरकर, महिला सेल अध्यक्षा स्नेहा सावंत, सचिव ऋतुजा गावडे आदी उपस्थित होते.