rat20p8.jpg-
32158
राजापूर ः हिंदवी स्वराज्य प्रतिष्ठानच्यावतीने आयोजित कार्यक्रमात बोलताना डॉ. शुभम कुशे.

जातीपातीच्या पलीकडे जाऊन संघटित व्हा
डॉ. शुभम कुशेः छत्रपती संभाजी महाराज बलिदान महिना
सकाळ वृत्तसेवा
राजापूर, ता. २१ : “औरंगजेबाच्या आदेशाने ज्यांचा अनेक दिवस अमानुष छळ करण्यात आला त्या छत्रपती संभाजी महाराजांनी स्वाभिमानाने धर्मासाठी अनन्वित यातना सहन केल्या; मात्र अखेरपर्यंत हिंदू धर्माचा त्याग केला नाही. त्यांच्या त्यागाला खरी आदरांजली म्हणून प्रत्येक हिंदूने जातीपातीच्या पलीकडे जाऊन संघटित होणे ही काळाची गरज आहे,” असे प्रतिपादन डॉ. शुभम कुशे यांनी केले.
शहरात हिंदवी स्वराज्य प्रतिष्ठानच्या वतीने छत्रपती संभाजी महाराज बलिदान मास पाळण्यात आला. त्याची सांगता शहरातील श्रीदेव चव्हाटा मंदिर येथे करण्यात आली. यावेळी आयोजित कार्यक्रमात बोलताना डॉ. कुशे यांनी वरील प्रतिपादन केले.
या वेळी ते म्हणाले, “त्या काळात हिंदू राजा छत्रपती संभाजी महाराजांनी गाजवलेल्या पराक्रमामुळे औरंगजेबाची झोप उडाली होती. तब्बल नऊ वर्षे स्वराज्याच्या केसालाही धक्का लावता न आल्याने औरंगजेबाच्या मनात संभाजी महाराजांविषयी प्रचंड भीती आणि राग निर्माण झाला होता. दुर्दैवाने, दगाफटका झाल्यामुळे छत्रपती संभाजी महाराज पकडले गेले. अनेक दिवस अमानुष छळ सहन करूनही त्यांनी हिंदू धर्माचा आणि भगव्याचा त्याग केला नाही. हा त्यांनी घालून दिलेला आदर्श आजही प्रेरणादायी आहे.”

कोट
“आजही हिंदू समाजासमोर विविध आव्हाने उभी आहेत. परिस्थिती फार वेगळी नाही. त्यामुळे छत्रपती संभाजी महाराजांची धर्मनिष्ठा आणि स्वराज्यनिष्ठा आदर्श मानून जागरूक राहणे आवश्यक आहे. जातीपातीच्या पलीकडे जाऊन एकत्रित होणे हीच काळाची गरज आहे.”
- डॉ. शुभम कुशे