rat1p16.jpg -
34712
गुहागर - किनारी कासवांच्या पिल्लांना समुद्रात सोडण्यात आले.

गुहागरमध्ये आजपासून
‘कासव महोत्सव’ सुरू
पर्यटकांचा प्रतिसाद ; १८६ घरटी संरक्षित
सकाळ वृत्तसेवा
गुहागर, ता. १ : निसर्गप्रेमींसाठी आकर्षणाचे केंद्र असलेल्या ‘ऑलिव्ह रिडले’ कासव महोत्सवाला गुहागरमधील पिंपळादेवी बीच (वरचापाट) येथे आजपासून उत्साहात सुरुवात झाली. महोत्सवाच्या पहिल्याच दिवशी पर्यटकांनी मोठा प्रतिसाद दिला असून, संपूर्ण एप्रिलमध्ये या महोत्सवाचे आयोजन केले आहे.
गुहागर समुद्रकिनाऱ्यावरील रामेश्वर स्मशानभूमी ते बाग या परिसरात ऑलिव्ह रिडले कासवांचे मोठ्या प्रमाणावर संवर्धन केले जाते. यावर्षी गुहागरमध्ये तब्बल १८६ घरटी संरक्षित केली असून, हा आकडा गेल्या दोन वर्षांतील महाराष्ट्रातील सर्वाधिक घरट्यांपैकी एक आहे. या संवर्धन केंद्रांतून दररोज सकाळी कासवांची पिल्ले समुद्रात सोडली जातात. महाराष्ट्रातील सर्वांत लांब आणि सुंदर समुद्रकिनारा लाभलेल्या गुहागरमध्ये कासवांचे संवर्धन प्रभावीपणे होत आहे. निसर्गाचा हा अनोखा आविष्कार पर्यटकांना प्रत्यक्ष पाहता यावा, वनविभागाच्या ‘शेड्युल १’ श्रेणीतील या कासवांच्या जीवनचक्राची माहिती मिळावी आणि स्थानिक पर्यटनाला चालना मिळावी, या उद्देशाने कांदळवन कक्ष व गुहागर नगरपंचायतीच्या वतीने हा महोत्सव भरवण्यात आला आहे. कासवांचा हा जीवनप्रवास अनुभवण्यासाठी पर्यटकांनी दररोज सकाळी ६:३० वाजता किनाऱ्यावर उपस्थित राहावे, असे आवाहन नगरपंचायत आणि वनविभागामार्फत केले आहे.