35739

कणकवली येथे शुक्रवारी
सोनू निगम यांचा कार्यक्रम

सकाळ वृत्तसेवा
ओरोस, ता. ६ ः माजी मुख्यमंत्री तथा भाजप खासदार नारायण राणे यांचा शुक्रवारी (ता. १०) ७४ वा वाढदिवस असून ते अमृत महोत्सवी वर्षात पदार्पण करीत आहेत. यानिमित्त जिल्हावासीयांनी अमृत महोत्सवी वर्ष स्वागत समिती स्थापन केली आहे. समितीतर्फे ७४ व्या वाढदिवसापासून अमृत महोत्सव अर्थात ७५ व्या वाढदिवसापर्यंत वर्षभर विविध उपक्रम राबवून हे अमृत महोत्सवी वर्ष यादगार बनविण्याचे निश्चित केले आहे.
कणकवली उपजिल्हा रुग्णालय पटांगणावर शुक्रवारी (ता. १०) वाढदिवस कार्यक्रम होणार असून त्यानंतर प्रसिद्ध गायक सोनू निगम यांचा गायनाचा कार्यक्रम होणार आहे. सायंकाळी मान्यवर, नेत्यांच्या उपस्थितीत नारायण राणे यांचा वाढदिवस थाटात साजरा होणार आहे. या कार्यक्रमासाठी जिल्ह्यातील राजकीय आणि सामाजिक क्षेत्रातील कार्यकर्ते, हितचिंतक तसेच जिल्हावासीयांनी मोठ्या संख्येने उपस्थित राहावे, असे आवाहन स्वागत समितीतर्फे करण्यात आले आहे. खासदार राणे यांना शुभेच्छा देताना पुष्पगुच्छ ऐवजी पुस्तक स्वरुपात भेट स्वीकारण्याचा अभिनव उपक्रम हाती घेण्यात आला आहे. जेणेकरून भेटीद्वारे संकलित पुस्तकांचे वितरण जिल्ह्यातील ग्रंथालयांना करण्यात येवून जिल्ह्यात वाचक चळवळ वृद्धिंगत होण्यास हातभार लागेल. या वाढदिवसापासून १० एप्रिल २०२७ पर्यंत वर्षभर विविध सामाजिक उपक्रम राबविण्यात येणार आहेत.