37589

कुडाळात कचरा डेपोला
आग लागल्याने तारांबळ

सकाळ वृत्तसेवा
कुडाळ, ता. १५ ः कुडाळ नगरपंचायतीच्या सांगिर्डेवाडी येथील कचरा डेपोला आज दुपारी तीनच्या सुमारास भीषण आग लागली. भर दुपारच्या वेळेस लागलेली आग वाऱ्याने भडकली. या घटनेमुळे प्रशासकीय यंत्रणेची तारांबळ उडाली.
आगीने रौद्ररुप धारण करीत संपूर्ण कचरा डेपोला वेढा दिला. आगीची माहिती मिळताच नगरपंचायत प्रशासनाने तातडीने घटनास्थळी धाव घेतली. नगरपंचायत व एमआयडीसीचे अग्निशमन बंब घटनास्थळी पाचारण करण्यात आले. शर्थीचे प्रयत्न करून अखेर आगीवर नियंत्रण मिळविण्यात आले. नगराध्यक्ष प्राजक्ता बांदेकर-शिरवलकर, नगरसेवक नीलेश परब, नगरसेविका संध्या तेरसे, श्रेया गवंडे यांच्यासह लोकप्रतिनिधी व नागरिक घटनास्थळी उपस्थित होते. शहरातील गोळा केलेला कचरा सांगिर्डेवाडी (महामार्गानजीक) पाण्याच्या टाकी नजीकच्या जागेत साठविला जातो. या कचऱ्याला आज दुपारी अचानक आग लागल्याने प्रशासकीय यंत्रणेची तारांबळ उडाली.