नागवेकर आत्महत्या; तपास गतीने
सीडीआर छाननी; सावकारी त्रासाचाही शोध
सकाळ वृत्तसेवा
रत्नागिरी, ता. २१ : तालुक्यातील तोणदे येथील प्रसिद्ध आंबा व्यावसायिक रूपेश उर्फ बाब्या नागवेकर यांच्या आत्महत्येचे गूढ उकलण्यासाठी ग्रामीण पोलिसांनी तपासाची चक्रे वेगाने फिरवली आहेत. नागवेकर यांनी स्वतःवर गोळी झाडून घेत जीवन संपवण्यामागे नेमके कोणते कारण आहे, याचा शोध घेण्यासाठी पोलिस गेल्या दोन महिन्यांतील कॉल डाटा रेकॉर्डची कसून तपासणी करत संशयास्पद व्यक्तींचे जबाब नोंदवण्याचे काम सुरू आहे.
काही दिवसांपूर्वी तोणदे येथील आंबा व्यावसायिक बाब्या नागवेकर यांनी स्वत:वर शेती संरक्षण बंदुकीमधून गोळी झाडून घेत आत्महत्या केली होती. आजारपण व कर्ज व्यवहारामुळे ही आत्महत्या केल्याची चर्चा सुरू होती. पोलिसांनी सर्व पर्याय डोळ्यासमोर ठेवत तपास सुरू ठेवला आहे. मागील दीड-दोन महिन्यात आलेल्या कॉलची माहिती, सीडीआर रिपोर्ट पोलिस घेत आहेत. अनेकवेळा फोन करणाऱ्यांना बोलावून त्यांचे जबाबही पोलिस घेत आहेत. सावकारीच्या त्रासाला कंटाळून त्यांनी आत्महत्या केली का? याचाही पोलिसांकडून शोध घेतला जात आहे. घरातील व्यक्तींचेही लवकरच जबाब नोंदवले जाणार आहेत. त्यातून तपासाच्यादृष्टीने आणखी काही माहिती हाती येण्याची शक्यता आहे. या प्रकरणात कोणी जबाबदार असेल तर त्याच्यावर कारवाई केली जाणार, असे संकेत ग्रामीण पोलिस निरीक्षक राजेंद्र यादव यांनी दिले.